ശത്രുസംഹാര അർച്ചനയും ഹോമവും മറ്റും എന്തിനുള്ളതാണെന്ന് അത് നടത്തുന്നവരിൽ പലര്ക്കും അറിയില്ല. നമ്മെ എതിർക്കുന്നതോ, നമുക്ക് കുഴപ്പങ്ങൾ സൃഷ്ടിക്കുന്നതോ ആയ ശത്രുക്കളെ നശിപ്പിക്കാനോ, ആ ശത്രുവിന്റെ ആക്രമണത്തിൽ നിന്നും രക്ഷനേടാനോ ഉള്ളതല്ല ശത്രുസംഹാര പൂജ സംഹരിക്കണം എന്ന് നാം ഉദ്ദേശിക്കുന്ന ശത്രു നമ്മുടെ ഉള്ളിൽ തന്നെയാണുള്ളത്. മോശപ്പെട്ട ചിന്താഗതികളിലേക്കും, മാനസിക അവസ്ഥകളിലേക്കും നമ്മെ പിടിച്ചുകൊണ്ടു പോകുന്ന ഒരു ശത്രു നമ്മുടെ ഉള്ളിൽ തന്നെയുണ്ട്. നമ്മെ പരാജയപ്പെടുത്താൻ ശ്രമിക്കുന്ന നമ്മുടെ ഉള്ളിലുള്ള ആ ശത്രുവിനെ സംഹരിക്കണമെന്ന ഉദ്ദേശത്തോടെ നടത്തുന്നതാണ് ശത്രുസംഹാര അർച്ചന.
മനുഷ്യന്റെ ഒരേ ഒരു ശത്രുവാണ് “കാമം”. കാമം എന്നതുകൊണ്ട് ലൈംഗികത മാത്രമല്ല അർത്ഥമാക്കുന്നത്. “കാമിക്കുക” എന്ത് കിട്ടിയാലും ശാന്തിയില്ലാത്ത ഒടുങ്ങാത്ത “ആഗ്രഹം” അതാണ് കാമം. മനസ്സ് കീഴടക്കിയവന് അത് പോലെ ഒരു നല്ല സുഹൃത്ത് ഇല്ല. എന്നാൽ അടങ്ങിയിരിക്കാത്ത മനസ്സ് പോലെ അവന് വേറെ ഒരു ശത്രു ലോകത്ത് ഇല്ലയെന്നാണ് ഭഗവത് ഗീതയില് പറയുന്നത്. തന്നിൽ നിന്ന് വേറെ ഒരാൾ ഇല്ല… സർവം ആത്മ സ്വരൂപം എന്നാണ് ഭാരതം പഠിപ്പിക്കുന്നത്. അവിടെ അങ്ങനെ കാണാൻ കഴിയാത്ത മനസ്സ് ഒഴിച്ച് വേറെ ഒരു ശത്രു ഇല്ല. ആ ശത്രുവിനെ വക വരുത്താനാണ്.ശത്രു സംഹാര പുഷ്പാഞ്ജലി.
മുരുകനെയാണ് ശത്രു സംഹാരകനായി വിശ്വാസികള് കാണുന്നത്. മുരുകന് ക്ഷേത്രത്തില് ശത്രു സംഹാര പൂജ നടത്തിയാല് ഗ്രഹദോഷം, ദൃഷ്ടിദോഷം, ശാപങ്ങള് എന്നിവയില് നിന്ന് മോചനം ലഭിക്കുമെന്നാണ് വിശ്വാസം. കുടുംബന്ധങ്ങള് ശക്തിപ്പെടുത്തുക, മാനസിക പ്രശ്നങ്ങള്, ഭയം, കടബാധ്യതകള് എന്നിവയില് നിന്നുള്ള മോചനം, ധന അഭിവൃദ്ധി എന്നിവക്കെല്ലാം ശത്രു സംഹാര പൂജ നടത്താറുണ്ട്.
പ്രതികരിക്കാൻ ഇവിടെ എഴുതുക