കൊച്ചി: പ്രതിഷേധങ്ങള് കനത്താലും എന്തുവന്നാലും ശബരിമലയില് ദര്ശനം നടത്തിയേ മടങ്ങൂ എന്ന് തൃപ്തി ദേശായി. ഇന്ന് ദര്ശനം സാധ്യമായില്ലെങ്കില് കേരളത്തില് തങ്ങും. സ്ത്രീകളെ ബഹുമാനിക്കാതെ പ്രതിഷേധിക്കുന്നവര് അയ്യപ്പഭക്തരല്ലെന്നും ദര്ശനത്തിനുള്ള സൗകര്യം സര്ക്കാരും പൊലീസും ഒരുക്കണമെന്നും തൃപ്തി പറഞ്ഞു.
കൊച്ചിയില്പോലും സഞ്ചാര സ്വാതന്ത്ര്യം നിഷേധിക്കുന്നത് ദൗര്ഭാഗ്യകരമാണ്. വിമാനത്താവളത്തിനു പുറത്ത് ബിജെപിയുടെ ഗുണ്ടായിസമാണെന്നും തൃപ്തി അറിയിച്ചു.
പുലര്ച്ചെ 4.45ന് നെടുമ്ബാശേരി അന്താരാഷ്ട്ര വിമാനത്താവളത്തിലെത്തിയ തൃപ്തി ദേശായിക്ക് മൂന്ന് മണിക്കൂറുകള്ക്ക് ശേഷവും പുറത്തിറങ്ങാന് കഴിഞ്ഞിട്ടില്ല. വിമാനത്താവളത്തില് നിന്ന് പോകാനായി ഇവര് വാഹനം സജ്ജീകരിച്ചിരുന്നില്ല.
തൃപ്തി ദേശായിയെ വിമാനത്താവളത്തില് നിന്ന് കൊണ്ടുപോകാനാവില്ലെന്ന് ഓണ്ലൈന് ടാക്സി ഡ്രൈവര്മാര് അറിയിച്ചു. തൃപ്തിയെയും സംഘത്തെയും കൊണ്ടുപോകാന് വിമാനത്താവളത്തിലെ പ്രീപെയ്ഡ് ടാക്സി ഡ്രൈവര്മാര് നേരത്തെ തന്നെ വിസമ്മതം അറിയിച്ചിരുന്നു.
തനിക്കും ഒപ്പമുള്ള അഞ്ച് സ്ത്രീകള്ക്കും താമസവും യാത്രയും അടക്കമുള്ള സംവിധാനങ്ങള് സംസ്ഥാന സര്ക്കാര് ഒരുക്കണമെന്ന് ഇവര് കത്തിലൂടെ ആവശ്യപ്പെട്ടിരുന്നെങ്കിലും പൊലീസ് ഇത് തള്ളിയിരുന്നു.
പ്രതികരിക്കാൻ ഇവിടെ എഴുതുക