കോട്ടയം: മീൻകറിയും മുട്ടപൊരിച്ചതും കൂട്ടി സ്വാദിഷ്ടമായ ഉച്ചയൂണ്, ഇടവേളകളിൽ ഓറഞ്ച്, ആപ്പിൾ, മുന്തിരി ഉൾപ്പെടെയുള്ള ഫ്രൂട്സുകൾ. ഇടവേളകളിൽ പരിചരണത്തിന്റെ നഴ്സുമാരും പരിശോധനയ്ക്ക് ഡോക്ടർമാരും.
കോട്ടയം മെഡിക്കൽ കോളജിലും പത്തനംതിട്ട ജനറൽ ആശുപത്രിയിലും കഴിയുന്ന ഐസൊലേഷൻ യൂണിറ്റിൽ ചികിത്സയിൽ കഴിഞ്ഞ കുടുംബങ്ങളുടെ അനുഭവമാണ് പറയുന്നത്.
28 ദിവസം ആശുപത്രിയിൽ മറ്റു സന്പർക്കങ്ങളൊന്നുമില്ലാതെ ഐസൊലേഷൻ യൂണിറ്റിൽ കഴിയണമെന്നാണ് നിർദേശിച്ചിരിക്കുന്നത്. 10 ദിവസം മാത്രമേ പൂർത്തിയായിട്ടുള്ളു.
രോഗം ഭേദമാകാനും മറ്റുള്ളവരിലേക്കു പകരാതിരിക്കുന്നതിനു വേണ്ടിയാണല്ലോ ഇങ്ങനെ കഴിയുന്നതെന്ന ഒറ്റ ആശ്വാസം. അതിനാൽ കുഴപ്പമില്ല.
എങ്കിലും സമയവും ദിവസവും തള്ളിനീക്കാൻ നന്നേ പാടുപെടുകയാണ്. ബന്ധുക്കളുടെയും സുഹൃത്തുക്കളുടെയും ഫോണിൽകൂടിയുള്ള അന്വേഷണം ആശ്വാസം നൽകുന്നുണ്ട്.
കോട്ടയം മെഡിക്കൽ കോളജിലെ പേ വാർഡാണു ഐസൊലേഷൻ യൂണിറ്റായി പുനഃക്രമീകരിച്ചിരിക്കുന്നത്. ഒറ്റ മുറിയിൽ മൂന്നു പേരാണ് ഇവിടെ കഴിയുന്നത്. പത്തനംതിട്ടയിൽ അമ്മയും അച്ഛനും സഹോദരനും കഴിയുന്നു.
നാലു നേരവും നല്ല ഭക്ഷണമാണ് ലഭിക്കുന്നത്. ശുദ്ധമായ വെള്ളവും പഴവർഗങ്ങളും ഇടയ്ക്കു തരുന്നുണ്ട്. രാവിലെ ഇഡ്ലി, ദോശ, നെയ്റോസ്റ്റ്, അപ്പം എന്നിവയാണ് ലഭിക്കുന്നത്.
കടലക്കറി, ഗ്രീൻപീസ്, മുട്ടക്കറി എന്നിവയും ഉണ്ടാകും. ഉച്ചഭക്ഷണവും സ്വാദിഷ്ടവും പോഷക സമൃദ്ധവുമാണ്. ചോറിനൊപ്പം മീൻകറി, ഓംലറ്റ്, അവിയൽ, കൂട്ടുകറി, പപ്പടം, സാന്പാർ, മോരുകറി, അച്ചാർ എന്നിവയുണ്ട്. വൈകുന്നേരം നാലോടെ ചായയും ചെറുകടിയും ലഭിക്കും.
രാത്രി 7.30ന് അത്താഴം ലഭിക്കും. ചോറു വേണമെങ്കിൽ ചോറു തരും ചപ്പാത്തിയും കറിയുമാണു മിക്കപ്പോഴുമുള്ളത്. ഇടയ്ക്ക് ഒരു ദിവസം ബീഫ് കറിയും തന്നിരുന്നു.
കിടക്കുന്ന മുറി മൂന്നു നേരവും വൃത്തിയാക്കും. ശുചിത്വം കർശനമായി ഉറപ്പുവരുത്തുന്നുണ്ട്. ഡോക്ടേഴ്സ് ടീം എല്ലാ ദിവസവും വരും. സുഖാന്വേഷണം നടത്തും. ടീമിലെ ചില ഡോക്ടർമാർ ദിവസവും പല തവണകളിൽ അന്വേഷണത്തിനായി വരാറുണ്ട്.
ഡോ. ഹരിയും ഡോ. സജിത്തും നാലു വയസുള്ള ഞങ്ങളുടെ മോൾക്ക് എല്ലാ ദിവസവും ചോക്ലേറ്റ്, ബിസ്കറ്റ് എന്നിവയുമായെത്തും. രാവിലെയും ഉച്ചയ്ക്കും വൈകുന്നേരവും മുറിയും ബാത്ത് റൂമും അണുവിമുക്തമാക്കുന്നുണ്ട്. മെഡിക്കൽ സംഘം എല്ലാ ദിവസവും പല സമയങ്ങളിലായി എത്താറുണ്ട്.
മരുന്നു കാര്യമായി ഇല്ല. ചുമയ്ക്കും കഫകെട്ടിനും മരുന്നുണ്ടായിരുന്നു. ഇപ്പോൾ തീർന്നു. കഴിഞ്ഞ ദിവസം ചെറിയ പനി വന്നപ്പോഴും മരുന്നു തന്നു. മറ്റു മരുന്നുകളൊന്നുമില്ല.
കുട്ടിയുടെ ഒഴികെ മറ്റുള്ളവരുടെ രക്ത സാന്പിളുകൾ ഇപ്പോൾ മൂന്നു തവണ പരിശോധന നടത്തി. മൂന്നാമത്തെ പരിശോധന ഫലം എത്തിയില്ല.
പ്രതികരിക്കാൻ ഇവിടെ എഴുതുക