നാല് വര്ഷത്തിനുള്ളില് വിവാഹിതയാകും എന്ന് തുറന്നുപറഞ്ഞ് നടി നമിത പ്രമോദ്. വിവാഹശേഷം അഭിനയം ഉപേക്ഷിക്കുമെന്നാണ് താരം ഇപ്പോള് വെളിപ്പെടുത്തിയിരിക്കുന്നത്. മാധ്യമത്തിന് നല്കിയ അഭിമുഖത്തില് താരം പറഞ്ഞ വാക്കുകളാണ് ചര്ച്ചയാകുന്നത്.
”ഉടന് തന്നെ വിവാഹം ഉണ്ടാകില്ല. നാല് വര്ഷത്തിനുള്ളില് കല്യാണം ഉണ്ടാകും. അച്ഛനും അമ്മയും വിവാഹകാര്യമേ എന്നോടും അനിയത്തിയോടും പറയാറില്ല. വിവാഹം കഴിഞ്ഞാല് ഞാന് അഭിനയിക്കില്ല. വേറെ പദ്ധതികളുണ്ട്. അതെല്ലാം ചെയ്ത് സ്വസ്ഥമായിരിക്കണം” എന്നാണ് നമിതയുടെ വാക്കുകള്.
നടി എന്നതിനേക്കാള് വ്യക്തിപരമായി താന് സംതൃപ്തയാണ്. അഭിനയം ആദ്യം ഇഷ്ടമായിരുന്നില്ല. എന്നാല് ഇപ്പോള് ഒരുപാട് ഇഷ്ടമാണ്. ഇനി സിനിമ കിട്ടുമോ എന്നൊന്നും അറിയില്ല. സിനിമയുടെ വിജയത്തില് ആഹ്ലാദിക്കുകയും പരാജയപ്പെടുമ്പോള് സങ്കടപ്പെടുകയും ചെയ്യും. പക്ഷെ അത് വല്ലാതെ കൊണ്ട് നടക്കാറില്ല എന്ന് താരം പറയുന്നു.
സിനിമയില്ലാതായാല് വേറെ ജോലി ചെയ്ത് ജീവിക്കും. തിരക്കുകള് എല്ലാം മാറ്റിവെച്ച് സ്വസ്ഥമായി യാത്ര പോകണം. വലിയ ആര്ഭാടങ്ങളൊന്നും ഇല്ലാതെ കുടുംബത്തിനൊപ്പം എന്നാണ് നമിത പറയുന്നത്. അതേസമയം, അല് മല്ലു ആണ് നമിതയുടെതായി ഒടുവില് പുറത്തിറങ്ങിയ ചിത്രം.
നാദിര്ഷയും ജയസൂര്യയും ഒന്നിക്കുന്ന പുതിയ ചിത്രത്തില് നമിത നായികയായി എത്തുന്നുണ്ട്. മിനിസ്ക്രീന് സീരിയലുകളില് ബാലതാരമായി തിളങ്ങിയ നമിത ട്രാഫിക് എന്ന സിനിമയിലൂടെയാണ് ബിഗ് സ്ക്രീനിലേക്ക് എത്തിയത്. പുതിയ തീരങ്ങള് എന്ന ചിത്രത്തിലൂടെയാണ് നായികയായി അരങ്ങേറ്റം കുറിച്ചത്.
പ്രതികരിക്കാൻ ഇവിടെ എഴുതുക