ഉപ്പ് ചേര്ത്തു വറുത്ത വിഭവങ്ങള് ശീലമാക്കരുത് ഉപ്പ് കുറയ്ക്കാം
* പാകം ചെയ്യുന്പോള് മിതമായി ചേര്ക്കുന്നതിനു പുറമേ വിളന്പുന്പോള് കൂടുതല് അളവില് ഉപ്പു ചേര്ത്തു കഴിക്കരുത്.
* തൈര്, സാലഡ് എന്നിവ കഴിക്കുന്പോള് രുചിക്കുവേണ്ടി പലരും ധാരാളം ഉപ്പു ചേര്ത്തു കഴിക്കാറുണ്ട്. സാലഡില് ഉപ്പിനു പകരം നാരങ്ങാനീര്, വിനാഗിരി എന്നിവയില് ഏതെങ്കിലുമൊന്നു ചേര്ത്താലും രുചികരമാക്കാം. അത്തരത്തില് പ്രത്യേകമായി ഉപ്പു ചേര്ത്തു കഴിക്കുന്ന രീതി ഒഴിവാക്കുക.
* വിഭവങ്ങള് പാകം ചെയ്യുന്പോള് ഉപ്പ് മിതമായി ഉപയോഗിക്കുന്നതില് തെറ്റില്ല. എന്നാല് ഉപ്പ് കൂടുതലായി ഉപയോഗിക്കുന്നവര് അതു കുറയ്ക്കണം.
ഉപ്പും കൊളസ്ട്രോളും
ഉപ്പും കൊളസ്ട്രോളും തമ്മില് ബന്ധമില്ല. ശരീരത്തില് ഉത്പാദിപ്പിക്കപ്പെടുന്നതിനു പുറമേ നാം കഴിക്കുന്ന ഭക്ഷണത്തില് നിന്നാണ് ശരീരത്തില് കൊളസ്ട്രോള് കൂടുതലായി എത്തുന്നത്. പക്ഷേ, ബിപിയുള്ളവര്ക്കു മിക്കപ്പോഴും കൊളസ്ട്രോളും കൂടുതലായിരിക്കും.
സ്ട്രോക്കും ഉപ്പും
സര്വേകള് പ്രകാരം സ്ട്രോക്ക് ഇപ്പോള് സ്ത്രീകളിലാണ് പുരുഷന്മാരേക്കാള് കൂടുതലായി കാണുന്നത്. സ്ട്രസ്, നിയന്ത്രിതമല്ലാത്ത രക്തസമ്മര്ദം, അമിതവണ്ണം, മരുന്നുകള് കൃത്യസമയത്തു കഴിക്കാത്ത അവസ്ഥ… ഇതെല്ലാം അടുത്തകാലത്തായി സ്ത്രീകളില് സ്ട്രോക്സാധ്യത വര്ധിപ്പിച്ചിരിക്കുന്നു. ഉപ്പ് അധികമായാല് ബിപി കൂടും. ബിപിയും സ്ട്രോക്കും തമ്മില് ബന്ധമുണ്ട്. അതിനാല് എല്ലാവരും ഉപ്പ് മിതമായി മാത്രം ഉപയോഗിക്കുന്നതാണ് ആരോഗ്യകരം.
അയഡിന് ചേര്ത്ത കറിയുപ്പ്
അയഡിന് ചേര്ത്ത ഉപ്പ് വര്ഷങ്ങളായി ഉപയോഗിച്ചതിനാല് പ്രായമുള്ളവരില് തൈറോയ്ഡ് സംബന്ധമായ രോഗങ്ങള് കൂടുന്നതായി ചിലര് പ്രചരിപ്പിച്ചു വരുന്നുണ്ട്. വാസ്തവത്തില് അയഡിന് ശരീരത്തില് അടിഞ്ഞുകൂടുന്നതു തീരെ കുറഞ്ഞ അളവില് മാത്രം. അധികമുള്ളതു മൂത്രത്തിലൂടെ പുറന്തള്ളപ്പെടുകയാണ്. പ്രായമാകുന്നവരിലുണ്ടാകുന്ന തൈറോയ്ഡ് പ്രശ്നങ്ങള് അയഡിന് കൊണ്ടു മാത്രമല്ല.
സര്വേ നടത്തി അയഡിന് കുറവുള്ള 10 വയസിനു താഴെയുള്ള കുട്ടികളെ കണ്ടെത്തി അതു നികത്തുന്നതിനുള്ള പദ്ധതിയാണ് നാഷണല് അയഡിന് ഡെഫിഷ്യന്സി ഡിസോഡര് കണ്ട്രോള് പ്രോഗ്രാം. അയഡിന് ചേര്ത്ത കറിയുപ്പ് ഉപയോഗിക്കണമെന്നു നിര്ദേശിച്ചത് അതിന്റെ ഭാഗമായാണ്. അയഡൈസ്ഡ് ഉപ്പ് കഴിച്ചാല് കൊച്ചുകുട്ടികളില് ഓര്മശക്തി മെച്ചപ്പെടുത്തുമെന്നാണ് പഠനങ്ങള്.
ദിവസവും കഴിക്കരുത്
എരിവും പുളിയും ഉപ്പും എണ്ണയും ധാരാളമുള്ള സ്നാക്സ്, ചിപ്സ് എന്നിവയുടെ ഉപയോഗം കുറയ്ക്കണം. ഉപ്പു ചേര്ത്തു വറുത്ത വിഭവങ്ങളുടെ ഉപയോഗം കുറയ്ക്കണം. അത്തരം വിഭവങ്ങള് പതിവായി കഴിക്കരുത്. ഉപ്പു ചേര്ത്തു വറുത്ത നിലക്കടല, കടല എന്നിവ ദിവസവും കഴിക്കരുത്.
ഉണക്കമീന് ശീലമാക്കരുത്
ഉണക്കമീന് പതിവായി കഴിക്കുന്നവരുടെ ആമാശയത്തില് കാന്സറിനു മുന്നോടിയായുള്ള ലക്ഷണങ്ങള് കണ്ടുവരാറുണ്ട്. ഉണക്കമീനില് ഉപ്പിന്റെ അംശം കൂടുതലാണ്. അതിനാല് ഉണക്കമീന്(ഡ്രൈ ഫിഷ്) പതിവായി കഴിക്കരുത്.
പ്രതികരിക്കാൻ ഇവിടെ എഴുതുക