ബി. ഉണ്ണികൃഷ്ണന്- മോഹന്ലാല് ചിത്രം ‘ആറാട്ടി’ന്റെ ഊട്ടിയിലെ ഷെഡ്യൂള് പൂര്ത്തിയായി. ഊട്ടിയില് ഒരു ഗാനരംഗം ചിത്രീകരിച്ചതിന് ശേഷം ക്ലൈമാക്സ് രംഗങ്ങളുടെ ചിത്രീകരണത്തിനായി മോഹന്ലാല് കൊച്ചിയിലെത്തി. നെയ്യാറ്റിന്കര ഗോപന് എന്ന മോഹന്ലാല് കഥാപാത്രം ചില കാരണങ്ങളാല് പാലക്കാട്ടെ ഒരു ഗ്രാമത്തില് എത്തുന്നതും തുടര്ന്നുണ്ടാകുന്ന സംഭവങ്ങളുമാണ് ആറാട്ടിന്റെ കഥ.
കെജിഎഫ് ചാപ്റ്റര് വണ്ണിലെ വില്ലന് രാമചന്ദ്ര രാജുവാണ് ആറാട്ടില് മോഹന്ലാലിന് എതിരാളി ആയി എത്തുന്നത്. ഓഗസ്റ്റ് 12ന് ആണ് ചിത്രം റിലീസ് ചെയ്യുന്നത് എന്ന് ബി. ഉണ്ണികൃഷ്ണന് സൗത്ത്ലൈവിനോട് പ്രതികരിച്ചിരുന്നു. മാസ് എന്റര്ടെയ്നറായി ഒരുങ്ങുന്ന ആറാട്ടിനായി ഏറെ പ്രതീക്ഷകളോടെയാണ് ആരാധകര് കാത്തിരിക്കുന്നത്.
ആറാട്ടിന്റെതായി പുറത്തിറങ്ങിയ പോസ്റ്ററുകളും ലൊക്കേഷന് ചിത്രങ്ങളും സോഷ്യല് മീഡിയയില് വൈറലായിരുന്നു. ‘വില്ലന്’ എന്ന സിനിമയ്ക്ക് ശേഷം ബി ഉണ്ണികൃഷ്ണനും മോഹന്ലാലും ഒരുമിക്കുന്ന സിനിമയാണിതെന്ന പ്രത്യേകതയുമുണ്ട്. പുലിമുരുകന് ചിത്രത്തിന് ശേഷം മോഹന്ലാലിനു വേണ്ടി ഉദയകൃഷ്ണ തിരക്കഥ ഒരുക്കുന്ന ചിത്രമാണിത്.
ശ്രദ്ധ ശ്രീനാഥ് ആണ് ആറാട്ടില് നായിക. നെടുമുടി വേണു, സായ്കുമാര്, വിജയരാഘവന്, സിദ്ദിഖ്, ജോണി ആന്റണി, ഇന്ദ്രന്സ്, ഷീല, സ്വാസിക, രചന നാരയണന്കുട്ടി, മാളവിക തുടങ്ങിയവരാണ് ചിത്രത്തിലെ മറ്റ് കഥാപാത്രങ്ങള്. രാഹുല് രാജ് സംഗീതം ഒരുക്കുന്ന ചിത്രത്തിന്റെ എഡിറ്റിംഗ് നിര്വ്വഹിക്കുന്നത് ഷമീര് മുഹമ്മദ് ആണ്.
പ്രതികരിക്കാൻ ഇവിടെ എഴുതുക