Home INTERNATIONAL ചരിത്രം തിരുത്തി സന രാമചന്ദ്, സി‌എസ്‌എസ് പരീക്ഷയിൽ വിജയിയായ ആദ്യ പാക് ഹിന്ദു യുവതി

ചരിത്രം തിരുത്തി സന രാമചന്ദ്, സി‌എസ്‌എസ് പരീക്ഷയിൽ വിജയിയായ ആദ്യ പാക് ഹിന്ദു യുവതി

പാക് സിവില്‍ സര്‍വ്വീസിലെത്തിയ (സി‌എസ്‌എസ്) ആദ്യ ഹിന്ദു യുവതി എന്ന നേട്ടവുമായി സന രാമചന്ദ്. പാകിസ്ഥാൻ അഡ്മിനിസ്ട്രേറ്റീവ് സർവീസസിലേക്കാണ് സന തിരഞ്ഞെടുക്കപ്പെട്ടത്. പാകിസ്ഥാനിൽ ഏറ്റവും കൂടുതൽ ഹിന്ദു ജനസംഖ്യയുള്ള സിന്ധ് പ്രവിശ്യയിലെ ഷിക്കാർപൂർ ജില്ലയിലെ ഗ്രാമപ്രദേശത്ത് നിന്നുള്ള എംബിബിഎസ് ഡോക്ടറാണ് സന രാമചന്ദ്.

18,553 പേർ പങ്കെടുത്ത സി‌എസ്‌എസ് എഴുത്തു പരീക്ഷയിൽ വിജയികളായ 221 പേരിൽ ഒരാളാണ് സന. വിപുലമായ മെഡിക്കൽ, സൈക്കോളജിക്കൽ, ഓറൽ ടെസ്റ്റുകൾക്ക് ശേഷമാണ് അന്തിമ വിജയികളെ തിരഞ്ഞെടുത്തത്.

ഫലം പുറത്തുവന്നതിനുശേഷം സന ട്വീറ്റ് ചെയ്തു… “അല്ലാഹുവിന്റെ കൃപയാൽ ഞാൻ സി‌എസ്‌എസ് 2020 പരീക്ഷയിൽ വിജയം കരസ്ഥമാക്കിയിരുന്നു. ഇതിന്റെ എല്ലാ അംഗീകാരവും എന്റെ മാതാപിതാക്കൾക്കാണ്. ”

ഏറ്റവും പുതിയ സി‌എസ്‌എസിലെ വിജയശതമാനം രണ്ട് ശതമാനത്തിൽ താഴെയാണ്. പാകിസ്ഥാൻ പൊലീസ് സേവനങ്ങളും വിദേശ സേവനങ്ങളും പിന്തുടരുന്ന ഗ്രൂപ്പുകളിൽ പി‌എ‌എസ് എല്ലായ്‌പ്പോഴും മുൻ‌നിരയിലാണ്. പി‌ എ‌ എസിൽ ഉൾപെടുന്നവരെ അസിസ്റ്റന്റ് കമ്മീഷണർമാരായി നിയമിക്കുകയും പിന്നീട് ജില്ലാ കമ്മീഷണർമാരായി സ്ഥാനക്കയറ്റം നൽകുകയും ചെയ്യുന്നു.

സി‌എസ്‌എസ് പരീക്ഷയിൽ വിജയിച്ച ശേഷം പി‌എ‌എസിലേക്ക് തിരഞ്ഞെടുക്കപ്പെട്ട ആദ്യത്തെ ഹിന്ദു വനിതയാണ് രാംചന്ദ് എന്ന് ബിബിസി ഉറുദു റിപ്പോർട്ട് ചെയ്തു.

പി എ എസ് ഉൾപ്പെടെയുള്ള വിവിധ ഗ്രൂപ്പുകളിലേക്ക് മൊത്തം 79 വനിതകളാണ് അന്തിമ പട്ടികയിൽ ഇടം പിടിച്ചിരിക്കുന്നത്. മഹീൻ ഹസ്സൻ എന്ന വനിതയാണ് പരീക്ഷയിലെ ഉന്നത വിജയി.

സിന്ധ് പ്രവിശ്യയിലെ ചന്ദ്ക മെഡിക്കൽ കോളേജിൽ നിന്നാണ് സന എംബിബിഎസ് പൂർത്തിയാക്കിയത്. ഇപ്പോൾ സിന്ധ് ഇൻസ്റ്റിറ്റ്യൂട്ട് ഓഫ് യൂറോളജി ആൻഡ് ട്രാൻസ്പരന്റിൽ എഫ്‌സി‌പി‌എസ് ചെയ്യുന്നു, ഉടൻതന്നെ സർജനാകും.

രാഷ്ട്രീയ നേതാക്കൾ ഉൾപ്പെടെ ഒട്ടേറെ പ്രമുഖർ സേനയുടെ നേട്ടത്തിൽ അഭിനന്ദനം അറിയിച്ചു.
പാകിസ്ഥാൻ പീപ്പിൾ പാർട്ടിയുടെ മുതിർന്ന നേതാവ് ഫർഹത്തുല്ല ബാബർ സനയെ അഭിനന്ദിച്ചു.

Also Read :   നടിയെ ആക്രമിച്ച കേസ്; അന്വേഷണ ഉദ്യോഗസ്ഥരെ അപായപ്പെടുത്താന്‍ ഗൂഢാലോചന നടത്തിയ കേസില്‍ ദിലീപിന്റെ ജാമ്യാപേക്ഷ ഇന്ന് പരിഗണിക്കും