Home AUTOMOBILE ‘കെഎസ്‌ആര്‍ടിസി‍’ ഇനി കെഎസ്‌ആര്‍ടിസി‍ക്ക് സ്വന്തം; വര്‍ഷങ്ങളായുള്ള നിയമപോരാട്ടത്തിന് വിജയം

‘കെഎസ്‌ആര്‍ടിസി‍’ ഇനി കെഎസ്‌ആര്‍ടിസി‍ക്ക് സ്വന്തം; വര്‍ഷങ്ങളായുള്ള നിയമപോരാട്ടത്തിന് വിജയം

തിരുവനന്തപുരം: കെഎസ്‌ആര്‍ടിസി എന്ന ചുരുക്ക പേര് ഇനി കേരളത്തിന് മാത്രമേ ഉപയോഗിക്കാന്‍ കഴിയൂ. കേരളത്തിന്റെയും കര്‍ണാടകയുടേയും റോഡ് ട്രാന്‍സ്‌പോര്‍ട്ട് കോര്‍പ്പറേഷന്റെ വാഹനങ്ങളില്‍ പൊതുവായി കെഎസ്‌ആര്‍ടിസി എന്ന ചുരുക്ക പേര് ഉപയോഗിച്ച് വന്നിരുന്നു.

ട്രേഡ് മാര്‍ക്ക്‌സ് ആക്‌ട് 1999 പ്രകാരം കെഎസ്‌ആര്‍ടിസി എന്ന ചുരുക്കെഴുത്തും എംബ്ലവും ആനവണ്ടി എന്ന പേരും കേരള റോഡ് ട്രാന്‍സ്‌പോര്‍ട്ട് കോര്‍പ്പറേഷന് അനുവദിച്ച്‌ ഉത്തരവിറങ്ങി.

കേരളവും കര്‍ണാടകവും പൊതു ഗതാഗത സര്‍വീസുകളില്‍ കെഎസ്‌ആര്‍ടിസി എന്ന പേരാണ് വര്‍ഷങ്ങളായി ഉപയോഗിച്ച്‌ വരുന്നത്. എന്നാല്‍ ഇത് കര്‍ണാടകയുടേതാണെന്നും കേരള ട്രാന്‍സ്‌പോര്‍ട്ട് ഉപയോഗിക്കരുതെന്നും കാട്ടി 2014 ല്‍ കര്‍ണാടക നോട്ടീസ് അയയ്ക്കുകയായിരുന്നു.

പണ്ടത്തെ സിഎംഡിയായിരുന്ന അന്തരിച്ച ആന്റണി ചാക്കോയാണ് കേന്ദ്ര സര്‍ക്കാരിന് കീഴിലെ രജിസ്ട്രാര്‍ ഓഫ് ട്രേഡ്മാര്‍ക്കിന് കേരളത്തിന് വേണ്ടി അപേക്ഷിച്ചത്. വര്‍ഷങ്ങളായി നിയമപോരാട്ടം നടക്കുകയായിരുന്നു.

കര്‍ണാടകത്തിന് ഉടന്‍ തന്നെ നോട്ടീസ് അയയ്ക്കുമെന്ന് കെഎസ്‌ആര്‍ടിസി എംഡിയും ഗതാഗത സെക്രട്ടറിയുമായ ബിജു പ്രഭാകര്‍ അറിയിച്ചു. ഇത് വലിയ നേട്ടമാണെന്നും ഇതിനു വേണ്ടി പ്രയത്‌നിച്ച ഉദ്യോഗസ്ഥരെ അഭിനന്ദിക്കുന്നുവെന്നും ഗതാഗതമന്ത്രി ആന്റണി രാജു പറഞ്ഞു.

‘ആനവണ്ടി’ എന്ന പേര് പലരും പല കാര്യങ്ങള്‍ക്കായി ഉപയോഗിക്കുന്നുണ്ട്, അവര്‍ക്കെതിരെ നിയമ നടപടി സ്വീകരിക്കുമെന്നും ബിജു പ്രഭാകര്‍ പറഞ്ഞു.

Also Read :   വൈക്കത്ത് ദമ്പതികള്‍ വീട്ടിനുള്ളില്‍ മരിച്ച നിലയില്‍, ഭാര്യ മരിച്ചതറിഞ്ഞ് ഭര്‍ത്താവ് ജീവനൊടുക്കിയതെന്ന് സംശയം