വിവാദ ചിത്രം ‘ദി കേരള സ്റ്റോറി’യുടെ സംവിധായകന് സുദീപ്തോ സെന്നിനെ ദേഹാസ്വാസ്ഥ്യം അനുഭവപ്പെട്ടതിനെ തുടര്ന്ന് ആശുപത്രിയില് പ്രവേശിപ്പിച്ചതായി റിപ്പോർട്ട്. മുംബൈയിലെ കോകിലാബെന് ധീരുഭായ് അംബാനി ആശുപത്രിയിലാണ് പ്രവേശിപ്പിച്ചത് എന്നാണ് പുറത്തു വരുന്ന വിവരം.
നിര്ജലീകരണവും അണുബാധയും മൂലം സംവിധായകന് ചികിത്സയിലാണെന്ന് ആശുപത്രി അധികൃതര് അറിയിച്ചു ‘നിര്ജലീകരണവും അണുബാധയും കാരണം കോകിലാബെന് ആശുപത്രിയില് പ്രവേശിപ്പിച്ചിരിക്കുകയാണ്. എന്നാല് ആരോഗ്യനില നിയന്ത്രണത്തിലാണ്. ഇന്ന് എന്നെ ഡിസ്ചാര്ജ് ചെയ്യാന് സാധ്യതയുണ്ട്. എന്നെ വീട്ടിലേക്ക് പോകാന് അനുവദിക്കണമെന്ന് ഞാന് ഡോക്ടറോട് അഭ്യര്ഥിച്ചിട്ടുണ്ട്’ എന്ന് മാധ്യമങ്ങളോട് പ്രതികരിച്ചു കൊണ്ട് സുദീപ്തോ സെന് പറഞ്ഞു.
കേരളത്തിലെ യുവതികളെ തീവ്രവാദ സംഘടനകള് റിക്രൂട് ചെയ്തിട്ടുണ്ടെന്ന് സമര്ഥിക്കുന്ന ദി കേരള സ്റ്റോറി ചിത്രത്തിനെതിരെ വന് തോതിലുള്ള പ്രതിഷേധങ്ങളാണ് പലകോണുകളില്നിന്നും ഉയര്ന്നത്. വിവാദങ്ങള്ക്കിടെ റിലീസ് ചെയ്ത് ചിത്രം ആദ്യ ദിവസം മുതല് ബോക്സ് ഓഫീസില് മികച്ച പ്രകടനമാണ് കാഴ്ചവച്ചതെന്നാണ് കണക്കുകള് സൂചിപ്പിക്കുന്നത്.
പ്രതികരിക്കാൻ ഇവിടെ എഴുതുക