കൊച്ചി: കനത്ത മഴയിൽ വെള്ളക്കെട്ടായി വിവിധ നഗരപ്രദേശങ്ങൾ. കൊച്ചിയിലും തൃശൂരിലും ശക്തമായ മഴയാണ്. കനത്ത മഴ തുടരുന്ന സാഹചര്യത്തില് തിരുവനന്തപുരം ജില്ലയില് എട്ട് ദുരിതാശ്വാസ ക്യാമ്പകള് തുറന്നു. തിരുവനന്തപുരം, വര്ക്കല, കാട്ടാക്കട താലൂക്കുകളില് രണ്ട് ക്യാമ്പുകള് വീതവും നെയ്യാറ്റിന്കര, നെടുമങ്ങാട് താലൂക്കുകളില് ഓരോ ക്യാമ്പുകള് വീതവും പ്രവര്ത്തിക്കുന്നുണ്ട്.
തിരുവനന്തപുരം താലൂക്കില് ജിഎച്ച്എസ് കാലടി, നെടുമങ്ങാട് താലൂക്കില് തേമ്പാമൂട് അങ്കണവാടി, വര്ക്കല താലൂക്കില് മുട്ടള ജിഎല്പിഎസ്, കുളമുട്ടം ജിഎല്പിഎസ്, കാട്ടാക്കട താലൂക്കില് കാപ്പിക്കോട് പ്രാഥമിക ആരോഗ്യ കേന്ദ്രം, ഉഴമലയ്ക്കല് പഞ്ചായത്ത് ബഡ്സ് സ്കൂള് എന്നിവിടങ്ങളിലാണ് പുതിയ ക്യാമ്പുകള് തുറന്നത്.
കഴിഞ്ഞ ദിവസത്തെ മഴയില് വെള്ളം കയറിയ തൃശൂരിലെ അശ്വനി ആശുപത്രിയിലേക്ക് വീണ്ടും വെള്ളം കയറി. ഐ.സി.യുവിലേക്കടക്കം വെള്ളം കയറുന്ന സാഹചര്യമുണ്ടായി. ആശുപത്രിയുടെ മുന്വശത്തെ കാന നിറഞ്ഞതാണ് ആശുപത്രിയിലേക്ക് വെള്ളം കയറുന്നതിന് കാരണമായതെന്ന് പറയുന്നു. വെള്ളക്കെട്ടിനെ തുടര്ന്ന് രോഗികളെ മാറ്റി.
അതിശക്തമായ മഴയ്ക്ക് സാധ്യതയുണ്ടെന്ന മുന്നറിയിപ്പിന് പിന്നാലെ പെയ്ത പെരുമഴയിൽ തിരുവനന്തപുരം നഗരത്തെ വെള്ളക്കെട്ടിൽ ആഴ്ത്തി. റോഡുകളിൽ വെള്ളം നിറഞ്ഞതോടെ പലയിടങ്ങളിലും ഗതാഗതക്കുരുക്ക് രൂക്ഷമായി. തലസ്ഥാനത്തെ പ്രധാന വ്യാപാര കേന്ദ്രമായ ചാല മാർക്കറ്റിനെയും വെള്ളക്കെട്ട് സാരമായി ബാധിച്ചു.
പട്ടം, ഗൗരീശപട്ടം, പഴവങ്ങാടി, എസ് എസ് കോവിൽ റോഡ്, ബണ്ട് റോഡ്, കഴക്കൂട്ടം സർവീസ് റോഡ് തുടങ്ങിയ താഴ്ന്ന പ്രദേശങ്ങളെല്ലാം വെള്ളത്തിൽ മുങ്ങിയതോടെ ജന ജീവിതവും ദുസ്സഹമായി. നിരവധി ആളുകളെ ദുരിതാശ്വാസ ക്യാമ്പുകളിലേക്ക് മാറ്റി. കൊല്ലത്ത് 8 ക്യാമ്പുകളിലായി 877 പേരെയും, തിരുവനതപുരടത്ത് 5 ക്യാമ്പുകളിലായി 31 പേരെയുമാണ് മാറ്റിപാർപ്പിച്ചത്.
കോട്ടയത്ത് കൂടുതൽ ദുരിതാശ്വാസ ക്യാമ്പുകൾ തുറന്നു. ജില്ലയിലാകെ 17 ക്യാമ്പുകളിലായി 398 പേർ ദുരിതാശ്വാസ ക്യാമ്പിൽ. വിജയപുരം പഞ്ചായത്തിലെ കോശമറ്റം കോളനിയിൽ വെള്ളം കയറി. വിജയപുത്ത് മൂന്ന് ക്യാമ്പുകൾ തുറന്നു. മഴ ശമിച്ചെങ്കിലും കിഴക്കൻ വെള്ളത്തിന്റെ വരവ് കൂടിയത് താഴ്ന്ന പ്രദേശങ്ങളെ വെള്ളക്കെട്ടിലാക്കി.
പത്തനംതിട്ടയിലും രണ്ട് ദുരിതാശ്വാസ ക്യാമ്പുകൾ തുറന്നു. തിരുമൂലപുരം, കവിയൂർ എന്നിവിടങ്ങളിലാണ് ക്യാമ്പ് തുറന്നത്. കവിയൂർ 6 കുടുംബത്തിലെ 17 പേരും തിരുമൂലപുരം ഒരു കുടുംബത്തിലെ 3 പേരും ക്യാമ്പിൽ.
അടുത്ത 24 മണിക്കൂറിനുള്ളിൽ കാലവർഷം കേരളത്തിൽ എത്തിച്ചേരാൻ സാധ്യതയെന്ന് കേന്ദ്ര കാലാവസ്ഥാ വിഭാഗം അറിയിച്ചു. കേരള തീരത്ത് ശക്തമായ പടിഞ്ഞാറൻ കാറ്റ് നിലനിൽക്കുകയാണ്. ഇതിന്റെ ഫലമായി അടുത്ത ഏഴ് ദിവസം വ്യാപകമായി ഇടിമിന്നലോടൊപ്പമുള്ള മഴക്ക് സാധ്യതയുണ്ടെന്നാണ് കാലാവസ്ഥാ പ്രവചനം.
കൊച്ചിയിലും കനത്ത വെള്ളക്കെട്ടാണ്. കാക്കനാട് പടമുകളില് വീടിന്റെ മതിലിടിഞ്ഞ് വീണ് കാര് ചിറയിലേക്ക് വീണു. കഴിഞ്ഞ 24 മണിക്കൂറിനുള്ളില് 83.7 മില്ലി മീറ്റര് ആണ് കൊച്ചിയില് കിട്ടിയ മഴയുടെ കണക്ക്. നിലവില് ജില്ലയില് ഓറഞ്ച് അലര്ട്ടാണ്. ഒരു ദുരിതാശ്വാസ ക്യാമ്പും തുറന്നിട്ടുണ്ട്.കളമശേരി കാക്കാനാട്, തൃക്കാക്കര മേഖലയിലാണ് രൂക്ഷമായ വെള്ളക്കെട്ട്. വെള്ളം കയറിയ പ്രദേശത്തുനിന്ന് ആളുകളെ ഒഴിപ്പിച്ചു.
സംസ്ഥാനത്ത് ഏഴ് ജില്ലകളില് ഇന്ന് ഓറഞ്ച് അലര്ട്ട് ആണ്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി ജില്ലകളിലാണ് തീവ്രമഴയ്ക്ക് സാധ്യത. മറ്റ് ജില്ലകളിലെല്ലാം മഞ്ഞ മുന്നറിയിപ്പാണ്. കേരള, ലക്ഷദ്വീപ് തീരങ്ങളില് മത്സ്യത്തൊഴിലാളികള് കടലില് പോകരുതെന്ന് മുന്നറിയിപ്പുണ്ട്.
പ്രതികരിക്കാൻ ഇവിടെ എഴുതുക