കണ്ണൂര്: ടി പി ചന്ദ്രശേഖരന് വധക്കേസ് പ്രതികള്ക്ക് ശിക്ഷാ ഇളവ് അനുവദിക്കുന്നതുമായി ബന്ധപ്പെട്ട് കെ കെ രമയുടെ മൊഴിയെടുത്ത പൊലീസ് ഉദ്യോഗസ്ഥന് സ്ഥലം മാറ്റം. സംഭവത്തിൽ കൊളവല്ലൂര് എഎസ്ഐ ശ്രീജിത്തിനെയാണ് സ്ഥലം മാറ്റിയത്. കൊളവല്ലൂര് പൊലീസ് സ്റ്റേഷനില് നിന്ന് വയനാട്ടിലേക്കാണ് ഉദ്യോഗസ്ഥനെ സ്ഥലം മാറ്റിയത്. പ്രതികള്ക്ക് ശിക്ഷാ ഇളവു അനുവദിക്കാനുള്ള നീക്കത്തില് സര്ക്കാര് പ്രതിരോധത്തിലായിരുന്നു.
പ്രതികള്ക്ക് സര്ക്കാര് സംരക്ഷണം ഒരുക്കുന്നുവെന്ന് പ്രതിപക്ഷ ആരോപണവും ശക്തമാക്കിയിരുന്നു. ഇതോടെ പ്രതികള്ക്ക് ശിക്ഷാ ഇളവ് നല്കാന് ശുപാര്ശ ചെയ്ത ജയില് ഉദ്യോഗസ്ഥരെയടക്കം സര്ക്കാര് സസ്പെന്ഡ് ചെയ്യുകയുണ്ടായി. ശിക്ഷാ ഇളവിനുള്ള ശുപാര്ശയില് ടി പി ചന്ദ്രശേഖരന് വധക്കേസിലെ തടവുകാരെ ചേർത്ത് പൊലീസ് റിപ്പോര്ട്ട് തേടിയ ജയില് ഉദ്യോഗസ്ഥരെ സസ്പെന്റ് ചെയ്യാന് മുഖ്യമന്ത്രി പിണറായി വിജയന് ഉത്തരവ് ഇട്ടിരുന്നു. മൂന്ന് ജയില് ഉദ്യോഗസ്ഥരെയാണ് ഇതുവരെ സസ്പെന്ഡ് ചെയ്തത്.
കണ്ണൂര് സെന്ട്രല് ജയില് സൂപ്രണ്ടിന്റെ ചുമതലയുള്ള ജോയിന്റ് സൂപ്രണ്ട് കെ എസ് ശ്രീജിത്ത്, അസിസ്റ്റന്റ് സൂപ്രണ്ട് ഗ്രേഡ്-I ബി ജി അരുണ്, അസിസ്റ്റന്റ് പ്രിസണ് ഓഫീസര് ഒ വി രഘുനാഥ് എന്നിവരെയാണ് അന്വേഷണ വിധേയമായി ജോലിയിൽ നിന്ന് സസ്പെന്റ് ചെയ്യാന് ഉത്തരവായത്. ഇതിനു പിന്നാലെയാണ് ശിക്ഷാ ഇളവുമായി ബന്ധപ്പെട്ട് കെ കെ രമയുടെ മൊഴിയെടുത്ത ഉദ്യോഗസ്ഥന് നിലവിലെ സ്ഥലം മാറ്റവും.
ആസാദി കാ അമൃത് മഹോത്സവത്തിന്റെ ഭാഗമായി കഴിഞ്ഞ വര്ഷം തയ്യാറാക്കിയ ലിസ്റ്റിലാണ് പ്രതികളുടെ പേര് ചേർത്തിരുന്നത്. സര്ക്കാര് നിർദേശം അനുസരിച്ച് വിട്ടയക്കേണ്ട പ്രതികളുടെ പട്ടിക ജയില് ഉപദേശകസമിതി തയ്യാറാക്കിയപ്പോള് കേസില് ജീവപര്യന്തം തടവിന് ഹൈക്കോടതി വിധിച്ച രണ്ടാം പ്രതിയായ ടി കെ രജീഷ്, മുഹമ്മദ് ഷാഫി, അണ്ണന് സിജിത്ത് എന്നിവരെ ഉള്പ്പെടുത്തുകയായിരുന്നു.
പ്രതികരിക്കാൻ ഇവിടെ എഴുതുക