മുംബൈ: ഉത്തേജക മരുന്ന് പരിശോധനയില് ശരീരത്തില് നിരോധിത വസ്തുവിന്റെ സാന്നിധ്യം കണ്ടെത്തിയതിനെ തുടര്ന്ന് പൃഥ്വി ഷായ്ക്ക് ബി.സി.സി.ഐ വിലക്ക് ഏർപ്പെടുത്തി. ഡോപ്പിങ് നിയമലംഘനത്തിന്റെ പേരിലാണ് വിലക്ക്. കഫ് സിറപ്പുകളില് സാധാരണയായി കാണപ്പെടുന്ന നിരോധിത വസ്തുവാണ് ഷായ്ക്ക് തിരിച്ചടിയായത്. ഇത് അശ്രദ്ധമായി ഉപയോഗിച്ചതിനെ തുടര്ന്നാണ് നടപടി. 2019 നവംബര് 15 വരെയാണ് ഷായുടെ വിലക്ക്.
ഈ വര്ഷം ഫെബ്രുവരി 22-ന് നടന്ന സയ്യിദ് മുഷ്താഖ് അലി ട്രോഫി മത്സരത്തിനിടെ ഷാ നല്കിയ മൂത്രസാമ്പിള് പരിശോധിച്ചതിലാണ് നിരോധിത വസ്തുവിന്റെ സാന്നിധ്യം കണ്ടെത്തിയിരിക്കുന്നത്. ഇതോടെ എല്ലാ മത്സര ക്രിക്കറ്റില് നിന്നും താരത്തെ വിലക്കുകയായിരുന്നു. ഇതോടെ ലോക ടെസ്റ്റ് ചാമ്പ്യന്ഷിപ്പിന്റെ ഭാഗമായി ബംഗ്ലാദേശിനും ദക്ഷിണാഫ്രിക്കയ്ക്കുമെതിരേ നാട്ടില് നടക്കുന്ന പരമ്പരകളും താരത്തിന് നഷ്ടമാകും.
ചുമയ്ക്കായി മരുന്ന് കഴിച്ചിരുന്നുവെന്നും അബന്ധത്തില് സംഭവിച്ചതാണ് ഇക്കാര്യമെന്നുമാണ് ഷാ നല്കിയ വിശദീകരണം. മരുന്നിലെ ഘടകങ്ങള് ശ്രദ്ധിച്ചിരുന്നില്ലെന്നും ഷാ വ്യക്തമാക്കി.അതേസമയം ഷായുടെ വിശദീകരണം തൃപ്തികരമാണെന്നും പ്രകടനം മെച്ചപ്പെടുത്താനായിട്ടല്ല ടെര്ബുട്ടാലൈന് ഉപയോഗിച്ചതെന്നും ബി.സി.സി.ഐ പുറത്തിറക്കിയ പ്രസ്താവനയില് പറയുന്നു. പൃഥ്വി ഷായെ കൂടാതെ വിദര്ഭ താരം അക്ഷയ് ദല്ലാര്വാര്, രാജസ്ഥാന് താരം ദിവ്യ ഗജരാജ് എന്നിവര്ക്കും ഉത്തേജക മരുന്ന് പരിശോധനയില് പരാജയപ്പെട്ടതിനെ തുടര്ന്ന് വിലക്കേര്പ്പെടുത്തിയിട്ടുണ്ട്.
പ്രതികരിക്കാൻ ഇവിടെ എഴുതുക