ന്യൂഡല്ഹി: അപകീര്ത്തി കേസില് കോണ്ഗ്രസ് നേതാവ് രാഹുല് ഗാന്ധി കുറ്റക്കാരനെന്നു കണ്ടെത്തിയ സൂറത്ത് കോടതി വിധി സുപ്രീം കോടതി സ്റ്റേ ചെയ്തു. ഇതോടെ വയനാട് ലോക്സഭാ മണ്ഡലത്തില്നിന്നുള്ള രാഹുല് ഗാന്ധിയുടെ അംഗത്വത്തിനുള്ള അയോഗ്യത നീങ്ങും. സുപ്രിംകോടതിയുടെ ഇടക്കാല ഉത്തരവിലാണ് വിധി. സുപ്രിംകോടതിയുടെ വാദം പൂര്ത്തിയായി.
അഭിഭാഷകന് മനു അഭിഷേക് സിങ്വിയാണ് രാഹുല് ഗാന്ധിക്ക് വേണ്ടി ഹാജരായത്. മോദി സമുദായത്തെ അപമാനിച്ചിട്ടില്ലെന്ന് രാഹുല് വാദത്തില് ആവര്ത്തിച്ചു. മോദി സമുദായത്തെ അപമാനിച്ചെന്ന് കാണിച്ചെന്ന് വ്യക്തമാക്കുന്ന രേഖകള് ഒന്നും തന്നെ പരാതിക്കാരന് വിചാരണ കോടതിയില് ഹാജരാക്കിയിരുന്നില്ല. അയോഗ്യനായത് മൂലം വലിയ ക്ഷതം ഉണ്ടായെന്നും ചൂണ്ടിക്കാട്ടി.
എല്ലാ കള്ളന്മാര്ക്കും മോദി എന്ന പേരു വന്നതെങ്ങനെ എന്ന പരാമര്ശത്തിന്റെ പേരിലാണ്, രാഹുല് കുറ്റക്കാരനാണെന്നു കോടതി വിധിച്ചത്.
രാഹുലിന്റെ പരാമര്ശങ്ങള് ഔചിത്യമുള്ളതെന്നു കരുതാനാവില്ലെന്ന്, ജസ്റ്റിസ് ബിആര് ഗവായിയുടെ നേതൃത്വത്തിലുള്ള ബെഞ്ച് അഭിപ്രായപ്പെട്ടു. പൊതുരംഗത്തുള്ളവര് പ്രസംഗിക്കുമ്പോള് കൂടുതല് ജാഗ്രത പുലര്ത്തണമെന്നും കോടതി പറഞ്ഞു. എന്നാല് രാഹുലിനു പരമാവധി ശിക്ഷ നല്കിയ വിചാരണക്കോടതി നടപടിക്കു കാരണമൊന്നും കാണുന്നില്ല. അതുകൊണ്ടു കുറ്റക്കാരനെന്നു കണ്ടെത്തിയതു സ്റ്റേ ചെയ്യുകയാണെന്നും അന്തിമ വിധിക്കു വിധേയമായിരിക്കും ഇതെന്നും സുപ്രീം കോടതി വിധിച്ചു.
പ്രതികരിക്കാൻ ഇവിടെ എഴുതുക