തിരുവനന്തപുരം: സംസ്ഥാനത്ത് മഴ മുന്നറിയിപ്പില് മാറ്റം. ഇന്നും അതിശക്തമായ മഴ തുടരും. അതിനാൽ ഇന്ന് ഏഴ് ജില്ലകളില് ഓറഞ്ച് അലേര്ട്ട് പ്രഖ്യാപിച്ചു. തെക്ക് കിഴക്കന് അറബിക്കടലില് കേരള തീരത്തിനരികെ ന്യൂനമര്ദം രൂപപ്പെട്ടിട്ടുണ്ട്. ഇതിന്റെ ഫലമായി മഴയ്ക്കൊപ്പം ശക്തമായും കാറ്റിനും സാധ്യതയുണ്ട്.
കണ്ണൂര്, കോഴിക്കോട്, എറണാകുളം, ആലപ്പുഴ, ഇടുക്കി, കോട്ടയം, പത്തനംതിട്ട ജില്ലകള്ക്കാണ് ഓറഞ്ച് മുന്നറിയിപ്പുള്ളത്. തിരുവനന്തപുരം, കൊല്ലം, തൃശൂര്, പാലക്കാട്, മലപ്പുറം, വയനാട്, കാസര്ഗോഡ് ജില്ലകളില് ഇന്ന് യെല്ലോ അലേര്ട്ടാണുള്ളത്. തിരുവനന്തപുരം,കൊല്ലം, ആലപ്പുഴ, എറണാകുളം, കണ്ണൂര്, കോഴിക്കോട് ജില്ലകളില് നാളെ യെല്ലോ അലേര്ട്ടുണ്ട്. ആലപ്പുഴ, എറണാകുളം, തൃശൂര് ജില്ലകളില് മറ്റന്നാളും തിങ്കളാഴ്ച തിരുവനന്തപുരം, കൊല്ലം ജില്ലകള്ക്കും യെല്ലോ അലേര്ട്ടുണ്ട്.
ശക്തമായ കാറ്റും മോശം കാലാവസ്ഥയും പ്രതീക്ഷിക്കുന്നതിനാല് മത്സ്യത്തൊഴിലാളികള്ക്ക് മുന്നറിയിപ്പുണ്ട്. ഇനിയൊരു അറിയിപ്പുണ്ടാകുന്നത് വരെ കേരള തീരത്ത് നിന്ന് കടലില് പോകാന് പാടുള്ളതല്ല.
ബംഗാള് ഉള്ക്കടലില് രൂപപ്പെട്ട ന്യൂനമര്ദ്ദം നാളെ രാവിലെയോടെ ചുഴലിക്കാറ്റായി മാറാന് സാധ്യതയെന്ന് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്. വൈകുന്നേരത്തോടെ ശക്തിപ്രാപിച്ച് തീവ്രചുഴലിക്കാറ്റായി മാറാനും സാധ്യതയുള്ളതിനാല് ജാഗ്രത പാലിക്കണമെന്നും മുന്നറിയിപ്പില് പറയുന്നു.
മധ്യ പടിഞ്ഞാറന് ബംഗാള് ഉള്ക്കടലിലെ ശക്തികൂടിയ ന്യുനമര്ദ്ദം മധ്യ ബംഗാള് ഉള്ക്കടലില് തീവ്രന്യൂനമര്ദ്ദമായി ശക്തി പ്രാപിച്ചു. ശനിയാഴ്ച രാവിലെയോടെ മധ്യ കിഴക്കന് ബംഗാള് ഉള്ക്കടലില് ചുഴലിക്കാറ്റായും തുടര്ന്ന് വൈകുന്നേരത്തോടെ വീണ്ടും ശക്തി പ്രാപിച്ചു തീവ്രചുഴലിക്കാറ്റായും മാറാന് സാധ്യതയുണ്ട്. ഞായറാഴ്ച രാത്രിയോടെ ബംഗ്ലാദേശ് – സമീപ പശ്ചിമ ബംഗാള് തീരത്ത് സാഗര് ദ്വീപിനും ഖെപ്പുപാറക്കും ഇടയില് കരയില് പ്രവേശിക്കുമെന്നും കാലാവസ്ഥ വകുപ്പ് പ്രവചിക്കുന്നു.
പ്രതികരിക്കാൻ ഇവിടെ എഴുതുക