അറബിക്കടലില് രൂപം കൊണ്ട ടൗട്ടെ ചുഴലിക്കാറ്റിന്റെ കേന്ദ്രം നമ്മുടെ തീരത്തുനിന്ന് വടക്കോട്ട് സഞ്ചരിച്ചെങ്കിലും കേരളത്തില് ചുഴലിക്കാറ്റിന്റെ പ്രഭാവം തുടരുകയാണെന്ന് മുന്നറിയിപ്പ്.
അടുത്ത 24 മണിക്കൂര് കൂടി കേരളത്തില് ടൗട്ടെ ചുഴലിക്കാറ്റിന്റെ പ്രഭാവമുണ്ടാകുമെന്നാണ് പ്രതീക്ഷിക്കപ്പെടുന്നതെന്ന് മുഖ്യമന്ത്രി പിണറായി വിജയന് വാര്ത്താസമ്മേളനത്തില് അറിയിച്ചു.
സംസ്ഥാനത്ത് വ്യാപകമായ മഴയാണ് ലഭിച്ചു കൊണ്ടിരിക്കുന്നത്. രണ്ട് ദിവസമായി പെയ്യുന്ന അതിതീവ്ര മഴയും അതിശക്തമായ കാറ്റും സംസ്ഥാനത്തുടനീളം വലിയ നാശനഷ്ടങ്ങളാണ് സൃഷ്ടിച്ചിരിക്കുന്നത്.
കാലാവസ്ഥ വകുപ്പിന്റെ കണക്ക് പ്രകാരം കഴിഞ്ഞ രണ്ട് ദിവസങ്ങളില് മാത്രം കേരളത്തില് ആകെ രേഖപ്പെടുത്തിയ മഴ ശരാശരി 145.5 മില്ലിമീറ്ററാണ്.
കൊച്ചി, പീരുമേട് സ്റ്റേഷനുകളില് 200 മില്ലിമീറ്ററിന് മുകളിലുള്ള മഴ 24 മണിക്കൂറില് രേഖപ്പെടുത്തി. ഒട്ടുമിക്കയിടങ്ങളിലും അതിശക്തമായ മഴയാണ് രേഖപ്പെടുത്തിയത്.
വടക്കന് ജില്ലകളില് ഇന്ന് രാത്രിയും ചുഴലിക്കാറ്റിന്റെ ഭാഗമായുള്ള ശക്തമായ കാറ്റ് തുടരുമെന്നാണ് മുന്നറിയിപ്പുള്ളത്. ചുഴലിക്കാറ്റ് മൂലമുള്ള കടല്ക്ഷോഭം കുറച്ചു ദിവസങ്ങള് കൂടി തുടര്ന്നേക്കാമെന്നും മുന്നറിയിപ്പുണ്ട്.
അതുകൊണ്ട് ഈ ഘട്ടത്തില് താല്ക്കാലിക ദുരിതാശ്വാസ ക്യാമ്പുകളിലേക്ക് മാറി ആരുടേയും ജീവന് അപകടത്തില് പെടുന്നില്ല എന്നുറപ്പാക്കുകയാണ് വേണ്ടത്. എല്ലാവരുടെയും സഹകരണം ഈ കാര്യത്തില് സര്ക്കാര് അഭ്യര്ത്ഥിക്കുകയാണെന്നും മുഖ്യമന്ത്രി പറഞ്ഞു.
ചുഴലിക്കാറ്റ് മാറിയാലും അടുത്ത ദിവസങ്ങളില് തന്നെ സംസ്ഥാനത്ത് മണ്സൂണ് എത്തും. കാലവര്ഷം കേരളത്തിലെത്തുക മെയ് 31 നോട് കൂടിയായിരിക്കും എന്നാണ് കേന്ദ്ര കാലാവസ്ഥ വകുപ്പ് അറിയിപ്പ്.
കാലവര്ഷം ശക്തമാവുകയും വെള്ളപ്പൊക്ക സാധ്യതയുണ്ടെന്ന് കാണുകയും ചെയ്താല് സര്ക്കാര് നല്കുന്ന നിര്ദേശങ്ങള് പൂര്ണ്ണ മനസ്സോടെ സ്വീകരിക്കാനും പാലിക്കാനും എല്ലാവരും തയ്യാറാകണമെന്ന് മുഖ്യമന്ത്രി അഭ്യര്ത്ഥിച്ചു.
പ്രതികരിക്കാൻ ഇവിടെ എഴുതുക