സിക്ക വൈറസ് സ്ഥിരീകരിക്കുന്നവരുടെ എണ്ണം വര്ധിച്ച് വരുന്ന സാഹചര്യത്തില് തദ്ദേശസ്വയംഭരണ വകുപ്പ് മന്ത്രി എംവി ഗോവിന്ദന് മാസ്റ്റര്, ആരോഗ്യവകുപ്പ് മന്ത്രി വീണ ജോര്ജ് എന്നിവരുടെ നേതൃത്വത്തിൽ യോഗം ചേർന്നു.
സിക്ക വൈറസിന് പുറമേ ഡെങ്കിപ്പനിയും റിപ്പോര്ട്ട് ചെയ്യുന്ന സാഹചര്യത്തിലാണ് ഇരു വകുപ്പുകളുടേയും യോഗം വിളിച്ചതെന്ന് മന്ത്രി വീണാ ജോര്ജ് പറഞ്ഞു. സംസ്ഥാനത്ത് ജാഗ്രത നിര്ദേശം നല്കിയിട്ടുണ്ട്. സിക്ക വൈറസും ഡെങ്കിപ്പനിയും ഈഡിസ് കൊതുകുകളാണ് പരത്തുന്നതിനാല് കൊതുക് നശീകരണ പ്രവര്ത്തനങ്ങള്ക്കാണ് പ്രാധാന്യം നല്കുന്നത്. തദ്ദേശസ്വയംഭരണ സ്ഥാപനങ്ങള്ക്ക് എല്ലാ പിന്തുണയും ആരോഗ്യ വകുപ്പ് നല്കുന്നതാണെന്നും ആരോഗ്യ മന്ത്രി പറഞ്ഞു.
സംസ്ഥാനത്ത് ആകെ 28 പേര്ക്കാണ് സിക്ക വൈറസ് ബാധിച്ചത്. നിലവില് 8 കേസുകളാണുള്ളത്. അതില് 3 പേര് ഗര്ഭിണികളാണ്. എല്ലാവരുടേയും ആരോഗ്യ നില തൃപ്തികരമാണ്. സിക്ക വൈറസ് പരിശോധനകള് വര്ധിപ്പിക്കുന്നതാണ്. മൈക്രോ പ്ലാന് തയ്യാറാക്കിയാണ് പ്രതിരോധ പ്രവര്ത്തനങ്ങള് ഊര്ജിതമാക്കുന്നത്.
തദ്ദേശ സ്വയംഭരണ വകുപ്പ് അഡീഷണല് ചീഫ് സെക്രട്ടറി ശാരദ മുരളീധരന്, ആരോഗ്യ വകുപ്പ് പ്രിന്സിപ്പല് സെക്രട്ടറി ഡോ. രാജന് എന്. ഖോബ്രഗഡെ, ആരോഗ്യ വകുപ്പ് ഡയറക്ടര് ഡോ. വി.ആര്. രാജു, ഡി.എം.ഒ.മാര്, ഇരു വകുപ്പിലേയും ഉദ്യോഗസ്ഥര്, തദ്ദേശ സ്വയംഭരണ പ്രതിനിധികള് തുടങ്ങിയവര് യോഗത്തില് പങ്കെടുത്തു.
പ്രതികരിക്കാൻ ഇവിടെ എഴുതുക