ആന്റിഓക്സിഡന്റുകൾ, വൈറ്റമിനുകൾ, സസ്യ സംയുക്തങ്ങൾ എന്നിവയാൽ സമ്പന്നമായ ഒരു ഉഷ്ണമേഖലാ ഫലമാണ് പാഷൻ ഫ്രൂട്ട്. ഒരുതരം പാഷൻ പുഷ്പത്തിന്റെ പാസിഫ്ലോറയുടെ ഫലമാണ് പാഷൻ ഫ്രൂട്ട്. വലിപ്പത്തിലും നിറത്തിലും വ്യത്യാസമുള്ള നിരവധി തരം പാഷൻ ഫ്രൂട്ടുകൾ ഉണ്ട്. പർപ്പിൾ , മഞ്ഞ ഇനങ്ങളാണ് സാധാരണയായി കണ്ടുവരാറുള്ളത്. കേരളം പാഷൻഫ്രൂട്ട് കൃഷിക്ക് അനുയോജ്യമാണ് എന്നതുകൊണ്ട് തന്നെ ഇക്കാലത്ത് പല വീടുകളിലും കൃഷി ചെയ്യുന്നത് കണ്ടുവരാറുണ്ട്.
കലോറി കുറഞ്ഞതും ഉയർന്ന തോതിൽ നാരുകൾ ഉള്ളതുമായ പാഷൻ ഫ്രൂട്ട് ഏവർക്കും അനുയോജ്യമായ ഒരു ലഘുഭക്ഷണമാണ്. രുചി കൊണ്ട് മുൻപന്തിയിൽ നിൽക്കുന്ന പാഷൻ ഫ്രൂട്ട് മധുരം ചേർത്തും ജ്യൂസായും അല്ലാതെയുമൊക്കെ ആളുകൾ കഴിക്കാറുണ്ട്. പലർക്കും ഇവയിലുള്ള വിത്തുകൾ അത്ര ഇഷ്ടപ്പെടാറില്ലെങ്കിലും വിത്തുകളിലാണ് ഗുണങ്ങൾ അടങ്ങിയിരിക്കുന്നത്. വൈറ്റമിൻ എ, വൈറ്റമിൻ സി, ഡയറ്ററി ഫൈബർ, മഗ്നീഷ്യം, പൊട്ടാസ്യം, ഇരുമ്പ്, റൈബോഫ്ലേവിൻ, കരോട്ടിനോയിഡുകൾ, നിക്കോട്ടിനിക് ആസിഡ്, ഫ്ലേവനോയ്ഡുകൾ എന്നിവ ഇവയുടെ വിത്തുകളിൽ അടങ്ങിയിട്ടുണ്ട്.
വിത്തുകൾ ഭക്ഷ്യയോഗ്യമാണെന്നതിനാൽ തന്നെ ഇവ പേടികൂടാതെ ആർക്കും കഴിക്കാം. ഇവ ശരീരത്തിന് നിരവധി ഗുണങ്ങൾ നൽകുന്നവയാണ്. ഹൃദയാരോഗ്യം നിയന്ത്രിക്കാൻ വരെ ഈ പഴത്തിന് കഴിയുമെന്നത് ആരെയും അതിശയിപ്പിക്കുന്ന ഒരു കാര്യമാണ്. രക്തക്കുഴലുകൾ അയവുള്ളതാക്കി അതിലൂടെ മെച്ചപ്പെട്ട രക്തയോട്ടം പ്രോത്സാഹിപ്പിക്കാനും സഹായിക്കുന്ന പോളിഫെനോൾ പാഷൻ ഫ്രൂട്ടിന്റെ വിത്തുകളിൽ അടങ്ങിയിട്ടുണ്ട്. ഇത് രക്തസമ്മർദ്ദം കുറയ്ക്കുകയും ഹൃദയാഘാതം തടയുകയും ചെയ്യും. കൂടാതെ, ഇവയിലടങ്ങിയിട്ടുള്ള മഗ്നീഷ്യം എല്ലുകളെ ശക്തിപ്പെടുത്തുകയും ഓസ്റ്റിയോപൊറോസിസ് പോലുള്ള പ്രശ്നങ്ങൾ തടയുകയും ചെയ്യുന്നു.
കുടലിന്റെ ആരോഗ്യം മെച്ചപ്പെടുത്തുന്നതിനും കാത്തു സൂക്ഷിക്കാനും ചുവന്ന പാഷൻ ഫ്രൂട്ടിന്റെ വിത്തുകളും,വിത്തിലെ ലയിക്കാത്ത നാരുകളും ഗുണം ചെയ്യും. മാത്രമല്ല, ദഹനവ്യവസ്ഥയ്ക്കും കുടലിലെ നല്ല ബാക്ടീരിയകളെ സന്തുലിതമാക്കാനും സഹായിക്കുന്നു. വൻകുടലിൽ കാൻസർ വരാതിരിക്കാനും ഇവയുടെ വിത്തുകൾ സഹായിക്കുന്നു. അമിതമായ കൊഴുപ്പ് വർധിക്കുന്നത് തടയാനും മെറ്റബോളിസം മെച്ചപ്പെടുത്താനും ഇവയ്ക്ക് കഴിവുണ്ട്. പഴത്തിൽ അടങ്ങിയിരിക്കുന്ന ലയിക്കാത്ത നാരുകൾ മലവിസർജ്ജനം നിയന്ത്രിക്കാൻ സഹായിക്കുന്നവയാണ്. മലബന്ധം, ഹെമറോയ്ഡ് എന്നിവയിൽ നിന്നും ഇവ ശരീരത്തെ സംരക്ഷിക്കാൻ സഹായിക്കുന്നു .
വിത്തുകളിൽ അടങ്ങിയിട്ടുള്ള ആന്റിഫംഗൽ ഗുണങ്ങൾ ഫംഗസുകളുടെ വളർച്ചയെ പരിമിതപ്പെടുത്തുകയും നഖങ്ങളിലും കാലുകളിലും ഉണ്ടാകുന്ന ഫംഗസ് അണുബാധകൾ സുഖപ്പെടുത്തുകയും ചെയ്യും. ഉയർന്ന അളവിലുള്ള നാരുകളും ഗ്ലൈസെമിക് ഇൻഡക്സിലെ കുറവും കാരണം പ്രമേഹരോഗികൾ തിരഞ്ഞെടുക്കുന്ന പഴങ്ങളിൽ ഒന്നായി പാഷൻ ഫ്രൂട്ട് മാറുന്നു. കലോറി കൂട്ടാതെ തന്നെ വയർ നിറഞ്ഞതായി തോന്നിക്കുന്ന ‘പെക്റ്റിൻ’ എന്നയിനം നാരുകൾ ഇവയിൽ അടങ്ങിയിട്ടുണ്ട്. വൈറ്റമിൻ സി, കരോട്ടിൻ എന്നിവ അടങ്ങിയ പഴമായതിനാൽ പാഷൻ ഫ്രൂട്ട് ശരീരത്തിൻറെ പ്രതിരോധശേഷി വർധിപ്പിക്കാനും സഹായിക്കാറുണ്ട്.
പ്രതികരിക്കാൻ ഇവിടെ എഴുതുക