തിരുവനന്തപുരം: സംസ്ഥാനത്തെ റോഡുകളില് വാഹനങ്ങളുടെ വേഗപരിധി ദേശീയ വിജ്ഞാപനത്തിനനുസൃതമായി പുതുക്കുവാന് ഗതാഗതമന്ത്രി ആന്റണി രാജുവിന്റെ അധ്യക്ഷതയില് ചേര്ന്ന ഉന്നതലയോഗം തീരുമാനിച്ചു. ഇരുചക്ര വാഹനങ്ങളുടെ വേഗപരിധി കുറക്കാൻ തീരുമാനിച്ചതാണ് പ്രധാന മാറ്റം. ജൂലൈ ഒന്ന് മുതൽ പുതിയ വേഗപരിധി നിലവിൽ വരുമെന്ന് മന്ത്രി പറഞ്ഞു.
എ.ഐ കാമറകൾ പ്രവർത്തന സജ്ജമായതിനെത്തുടർന്നാണ് വേഗപരിധി പുനര്നിശ്ചയിക്കാൻ തീരുമാനിച്ചത്. നിലവിൽ സംസ്ഥാനത്ത് 2014ൽ നിശ്ചയിച്ച വേഗപരിധിയാണ് ഉള്ളത്. ഉന്നതതല യോഗത്തില് ഗതാഗത സെക്രട്ടറി ബിജു പ്രഭാകർ, അഡീഷനൽ ട്രാന്സ്പോര്ട്ട് കമീഷണര് പ്രമോജ് ശങ്കര് തുടങ്ങിയവര് പങ്കെടുത്തു.
പുതുക്കിയ വേഗപരിധി
ആറ് വരി ദേശീയ പാതയില് 110 കിലോമീറ്ററാണ് വേഗത, നാല് വരി ദേശീയ പാതയില് 90 ആയിരുന്നത് 100 ആക്കി ഉയര്ത്തി, മറ്റ് ദേശീയപാത, എംസി റോഡ്, 4 വരി സംസ്ഥാന പാത എന്നിവയില് 85 ആയിരുന്നത് 90 ആക്കി, മറ്റ് സംസ്ഥാനപാതകളിലും പ്രധാന ജില്ലാ റോഡുകളിലും 80 , മറ്റു റോഡുകളില് 70 , നഗര റോഡുകളില് 50 കിലോമീറ്റര് എന്നിങ്ങനെയാണ് 9 സീറ്റ് വരെയുള്ള വാഹനങ്ങളുടെ അനുവദിനീയ വേഗപരിധി.
ഒമ്പത് സീറ്റിനു മുകളിലുള്ള ലൈറ്റ് -മീഡിയം ഹെവി മോട്ടോര് യാത്ര വാഹനങ്ങള്ക്ക് 6 വരി ദേശീയ പാതയില് 95 കിലോമീറ്റര്, 4 വരി ദേശീയ പാതയില് 90 , മറ്റ് ദേശീയപാത, എംസി റോഡ്, 4 വരി സംസ്ഥാന പാത എന്നിവയില് 85 കിലോമീറ്റര്, മറ്റ് സംസ്ഥാനപാതകളിലും പ്രധാന ജില്ലാ റോഡുകളിലും 80 , മറ്റു റോഡുകളില് 70 , നഗര റോഡുകളില് 50 കിലോമീറ്റര് എന്നിങ്ങനെയാണ് അനുവദനീയ വേഗപരിധി.
ലൈറ്റ് മീഡിയം ഹെവി വിഭാഗത്തില്പ്പെട്ട ചരക്ക് വാഹനങ്ങള്ക്ക് 6 വരി, 4 വരി ദേശീയപാതകളില് 80 കിലോമീറ്ററും മറ്റ് ദേശീയപാതകളിലും 4 വരി സംസ്ഥാന പാതകളിലും 70 കിലോമീറ്ററും മറ്റ് സംസ്ഥാനപാതകളിലും പ്രധാന ജില്ലാ റോഡുകളിലും 65 കിലോമീറ്ററും മറ്റ് റോഡുകളില് 60 കിലോമീറ്ററും നഗര റോഡുകളില് 50 കിലോമീറ്റര് ആയും നിജപ്പെടുത്തും.
ഇരുചക്ര വാഹനങ്ങളുടെ പരമാവധി വേഗപരിധി 70 കിലോമീറ്ററില് നിന്നും 60 ആയി കുറയ്ക്കും. മുച്ചക്ര വാഹനങ്ങളുടെയും സ്കൂള് ബസുകളുടെയും പരമാവധി വേഗപരിധി നിലവിലുള്ള 50 കിലോമീറ്ററായി തുടരും.
പ്രതികരിക്കാൻ ഇവിടെ എഴുതുക