വയനാട്ടിലെ വന്യജീവി ആക്രമണം തടയാനുള്ള നടപടികള് സംബന്ധിച്ച് ജില്ലയിലെ ജനപ്രതിനിധികളുമായി മുഖ്യമന്ത്രി പിണറായി വിജയന് ചര്ച്ച നടത്തി. മുഖ്യമന്ത്രിയുടെ അധ്യക്ഷതയില് കഴിഞ്ഞ ദിവസം ചേര്ന്ന ഉന്നതതല യോഗത്തിലെ തീരുമാനങ്ങള് യോഗം വിലയിരുത്തി.
മനുഷ്യരും വന്യമൃഗങ്ങളും തമ്മിലുള്ള സംഘര്ഷം വര്ധിക്കുകയാണെന്നും അതില് മനുഷ്യന് അപകടമില്ലാതെ എങ്ങനെ കൈകാര്യം ചെയ്യാമെന്നാണ് നാം ചിന്തിക്കേണ്ടതെന്നും മുഖ്യമന്ത്രി പറഞ്ഞു. മൂന്ന് സംസ്ഥാനങ്ങളില് നിന്നുള്ള നോഡല് ഓഫീസര്മാരുടെ യോഗം ഓണ്ലൈനായി നടത്തി. ഇത്തരം യോഗങ്ങള് കൃത്യമായി ചേരാന് മുഖ്യമന്ത്രി നിര്ദേശിച്ചു.റവന്യു, പൊലിസ്, വനം ഉദ്യോഗസ്ഥര് ചേര്ന്ന കമാന്ഡ് കണ്ട്രോള് സെന്റര് ശക്തിപ്പെടുത്തണം. ഇവരുള്പ്പെടുന്ന വാര്റൂം സജ്ജമാക്കണം. തദ്ദേശസ്വയംഭരണ സ്ഥാപനങ്ങളുടെ സഹകരണം ഉറപ്പാക്കി ഏകോപന സമിതിയും രൂപീകരിക്കും. ആര്ആര്ടികള് സ്ഥിരമാക്കണം. മുന്നറിയിപ്പ് സംവിധാനം ശക്തിപ്പെടുത്തണം. ജനങ്ങളെ ജാഗ്രതപ്പെടുത്താനുള്ള അറിയിപ്പ് നല്കാനാകണം. റെഡിയോ, കമ്മ്യൂണിറ്റി റേഡിയോ, വയര്ലെസ് സംവിധാനങ്ങള്, വാട്ട്സ് ആപ് ഗ്രൂപ്പുകള് എന്നിവ ഇതിനായി ഉപയോഗിക്കണം.വന്യജീവി ആക്രമണത്തില് മരിച്ചവർക്കും പരിക്കേറ്റവര്ക്കും 11.5 കോടി രൂപ നഷ്ടപരിഹാരം നല്കാനുള്ള നടപടികളായെന്ന് മുഖ്യമന്ത്രി അറിയിച്ചു. വയര്ലെസ് സെറ്റുകള്, ഡ്രോണുകള് എന്നിവ വാങ്ങാനുള്ള അനുമതി നല്കി കഴിഞ്ഞു. അതിര്ത്തിയില് തുടര്ച്ചയായി നിരീക്ഷണം നടത്താന് രൂപീകരിച്ച പ്രത്യേക ടീം ശക്തിപ്പെടുത്തണം. ചീഫ് ഫോറസ്റ്റ് കണ്സര്വേറ്റര് റാങ്കിലുള്ള ഒരു സ്പെഷ്യല് ഓഫീസറെ വയനാട് ജില്ലയില് നിയമിക്കും.
പ്രതികരിക്കാൻ ഇവിടെ എഴുതുക