മലയാളത്തില് ഈയടുത്ത് ഏറ്റവുമധികം പ്രേക്ഷകപ്രീതി നേടുന്ന ചിത്രങ്ങളില് ഒന്നായിരിക്കുകയാണ് നസ്ലെൻ മമത താരജോഡിയിൽ പുറത്തിറങ്ങിയ പ്രേമലു. ഫെബ്രുവരി 9 ന് റിലീസായ ചിത്രത്തിന് ആദ്യ ദിനം മുതല് മികച്ച അഭിപ്രായമാണ് ലഭിച്ചത്. തിയറ്ററുകളില് പൊട്ടിച്ചിരി സൃഷ്ടിക്കുന്നതില് ഈ റൊമാന്റിക് കോമഡി ചിത്രത്തിന് കഴിഞ്ഞതോടെ ആദ്യ വാരാന്ത്യം മുതല് വന് കളക്ഷനാണ് ചിത്രം നേടുന്നത്. ദിവസങ്ങള്ക്കിപ്പുറം മമ്മൂട്ടിയുടെ ഭ്രമയുഗമെത്തി മികച്ച അഭിപ്രായം നേടിയിട്ടും പ്രേമലു ബോക്സ് ഓഫീസില് അടിപതറിയില്ലെന്ന് മാത്രമല്ല, കുതിപ്പ് തുടരുകയാണ്. ഭാവന സ്റ്റുഡിയോസിന്റെ ബാനറില് ഫഹദ് ഭാസിലും ദിലീഷ് പോത്തനും ശ്യാം പുഷ്കരനും ചേര്ന്നാണ് പ്രേമല് നിര്മ്മിച്ചിരിക്കുന്നത്. ഇപ്പോഴിതാ ചിത്രത്തിന്റെ പ്രദര്ശനം സംബന്ധിച്ചുള്ള ഒരു പ്രചരണം തള്ളി രംഗത്തെത്തിയിരിക്കുകയാണ് ഫഹദ് ഫാസില്.
സമീപകാല മലയാള സിനിമകളെയൊക്കെ പോലെ മറ്റ് സംസ്ഥാനങ്ങളിലും മികച്ച സ്ക്രീന് കൗണ്ടുമായി ആയിരുന്നു ചിത്രത്തിന്റെ റിലീസ്. എന്നാല് കേരളത്തിന് പുറത്ത് എല്ലാ സെന്ററുകളിലും ഇംഗ്ലീഷ് സബ് ടൈറ്റിലുകള് ലഭ്യമല്ലെന്ന രീതിയിലുള്ള പ്രചരണം നടക്കുന്നതായി ഫഹദ് പറയുന്നു. അത് വാസ്തവമല്ലെന്നും. “കേരളത്തിന് പുറത്തുള്ള, മലയാളികളല്ലാത്ത ഞങ്ങളുടെ സുഹൃത്തുക്കളോട്, കേരളത്തിന് പുറത്തുള്ള എല്ലാ കേന്ദ്രങ്ങളിലും സബ് ടൈറ്റിലുകളോടെയാണ് ചിത്രം തീയറ്ററുകളിൽ പ്രദര്ശിപ്പിക്കുന്നത്. അതിന് കടകവിരുദ്ധമായ പ്രചരണങ്ങളെല്ലാം വ്യാജമാണ്. പ്രേമലുവിനോട് നിങ്ങളെല്ലാം കാണിക്കുന്ന സ്നേഹത്തിന് നന്ദി. ചിത്രം തിയറ്ററില് തന്നെ അനുഭവിക്കാന് മറക്കേണ്ട”, ഫഹദ് ഫാസില് കുറിച്ചു.
പ്രതികരിക്കാൻ ഇവിടെ എഴുതുക