തിരുവനന്തപുരം: സംസ്ഥാനത്ത് തദ്ദേശസ്വയം ഭരണ വകുപ്പിന്റെ നേതൃത്വത്തില് 24 മണിക്കൂറും പ്രവര്ത്തിക്കുന്ന കണ്ട്രോള് റൂം പ്രവര്ത്തനമാരംഭിച്ചു. മഴയെ തുടര്ന്ന് ജനങ്ങള്ക്കുണ്ടായ ബുദ്ധിമുട്ടുകള് പരിഹരിക്കാന് ആണ് തിരുവനന്തപുരം പ്രിന്സിപ്പല് ഡയറക്ടറേറ്റിൽ കണ്ട്രോള് റൂം ആരംഭിച്ചത്. 0471 2317214 ആണ് നമ്പര്.
മഴയെ തുടര്ന്ന് രൂപപ്പെട്ട വെള്ളക്കെട്ടുകള്, പെട്ടെന്നുണ്ടായ പകര്ച്ചവ്യാധികള് മറ്റ് ബുദ്ധിമുട്ടുകള് എന്നിവ സംബന്ധിച്ച് പൊതുജനങ്ങള്ക്ക് ഈ നമ്പറില് വിളിച്ച് അറിയിക്കാവുന്നതാണ്. പൊതുജനങ്ങള് ഈ സേവനം പരമാവധി ഉപയോഗപ്പെടുത്തണമെന്ന് തദ്ദേശസ്വയംഭരണ വകുപ്പ് പ്രിന്സിപ്പല് ഡയറക്ടര് എംജി രാജമാണിക്യം അഭ്യര്ഥിച്ചു.
അതേസമയം, സംസ്ഥാനത്ത് അടുത്ത അഞ്ച് ദിവസം അതിശക്തമായ മഴ തുടരുമെന്ന് കാലാവസ്ഥാ വകുപ്പ്. തെക്ക് കിഴക്കൻ അറബിക്കടലിൽ കേരള തീരത്തിന് അരികെ ന്യൂനമർദ്ദം രൂപപ്പെട്ടതിന്റെ ഫലമായി കേരളത്തിൽ അടുത്ത അഞ്ച് ദിവസം ഇടി, മിന്നൽ, കാറ്റ് തുടങ്ങിയവയോടെയുള്ള മഴയ്ക്ക് സാധ്യതയെന്ന് കാലാവസ്ഥാ വകുപ്പ് അറിയിച്ചു.
സംസ്ഥാനത്ത് വ്യാഴാഴ്ച രണ്ടുജില്ലകളില് റെഡ് അലേർട്ട് പ്രഖ്യാപിച്ചു. എറണാകുളം, തൃശ്ശൂര് ജില്ലകളിലാണ് റെഡ് അലേർട്ട് . പത്തനംതിട്ട, ആലപ്പുഴ, കോട്ടയം, ഇടുക്കി, പാലക്കാട്, മലപ്പുറം, കോഴിക്കോട്, വയനാട് എന്നീ ജില്ലകളില് ഓറഞ്ച് അലേർട്ട് ആണ്. തിരുവനന്തപുരം, കൊല്ലം, കണ്ണൂര്, കാസര്കോഡ് ജില്ലകളില് വ്യാഴാഴ്ച മഞ്ഞ അലേർട്ട് പ്രഖ്യാപിച്ചിട്ടുണ്ട്.
പ്രതികരിക്കാൻ ഇവിടെ എഴുതുക