കൊച്ചി: 28 വര്ഷത്തെ സജീവ മാധ്യമ പ്രവര്ത്തനം അവസാനിപ്പിച്ച് റിപ്പോര്ട്ടര് ടിവി എഡിറ്റര് ഇന് ചീഫ് എം വി നികേഷ് കുമാര്. രാഷ്ട്രീയ രംഗത്ത് സജീവമാകുന്നതിന്റെ ഭാഗമായാണ് മാധ്യമ രംഗത്ത് നിന്നുള്ള വിടവാങ്ങല്.
ഏഷ്യാനെറ്റ്, ഇന്ത്യാവിഷന്, റിപ്പോര്ട്ടര് ചാനലുകളില് പ്രവര്ത്തിച്ച നികേഷ്, റിപ്പോര്ട്ടര് ടി.വി. എഡിറ്റര് ഇന് ചീഫ് സ്ഥാനത്തുനിന്നാണ് പടിയിറങ്ങുന്നത്.എല്ലാ കാലത്തും തന്റെ ജീവിതത്തില് രാഷ്ട്രീയമുണ്ടായിരുന്നുവെന്ന് എം വി നികേഷ് കുമാര് പറഞ്ഞു.
‘ഒരു പൗരനെന്ന നിലയില് പൊതുപ്രവര്ത്തനത്തിന്റെ ഭാഗമായി വിവിധ രീതിയില് നിലകൊള്ളാനാണ് ആഗ്രഹിക്കുന്നത്. ഇനി സിപിഐഎം അംഗമായി പ്രവർത്തിക്കും. റിപ്പോര്ട്ടര് ടിവി ഞാന് ജന്മം നല്കിയ സ്ഥാപനമാണ്. എന്റെ കരുതലും സ്നേഹവുമെല്ലാം എല്ലാ കാലത്തും റിപ്പോര്ട്ടറിനൊപ്പം ഉണ്ടാകും. ചാനലിന്റെ ഭാഗമായി നിന്നുകൊണ്ട് പൊതുപ്രവര്ത്തനത്തില് സജീവമാകുന്നതിലെ തടസ്സം കൊണ്ടാണ് ഈ തീരുമാനം,’ എം വി നികേഷ് കുമാര് വിശദീകരിച്ചു.
ഒന്നാം പിണറായി സര്ക്കാര് അധികാരത്തില് വന്ന 2016 ലെ നിയമസഭാ തിരഞ്ഞെടുപ്പില് മാധ്യമപ്രവര്ത്തനത്തിന് അവധി നല്കി എല്ഡിഎഫ് സ്ഥാനാര്ഥിയായി അഴീക്കോട് മണ്ഡലത്തില് മത്സരിച്ചെങ്കിലും മുസ്ലിം ലീഗിലെ കെ.എം ഷാജിയോട് പരാജയപ്പെട്ടു.
സിഎംപി നേതാവും മുന് മന്ത്രിയുമായ എം.വി രാഘവന്റെ മകനായ നികേഷ് ഏഷ്യാനെറ്റ് ന്യൂസിലൂടെയാണ് മാധ്യമപ്രവര്ത്തന രംഗത്തേക്ക് വരുന്നത്. 2003 ല് കേരളത്തിലെ ആദ്യത്തെ മുഴുവന് സമയ വാര്ത്താ ചാനലായി ഇന്ത്യാവിഷന് ആരംഭിച്ചപ്പോള് എക്സിക്യൂട്ടീവ് എഡിറ്ററായി പ്രവര്ത്തിച്ചു. 2011ല് റിപ്പോര്ട്ടര് ടിവിക്ക് തുടക്കം കുറിച്ചു. രാംനാഥ് ഗോയങ്ക അവാര്ഡുള്പ്പെടെ നിരവധി പുരസ്കാരങ്ങള് അദ്ദേഹത്തിന് ലഭിച്ചിട്ടുണ്ട്.
പ്രതികരിക്കാൻ ഇവിടെ എഴുതുക