കൊച്ചി: കൊച്ചി കോർപറേഷന്റെ സ്വപ്നപദ്ധതിയായ സമൃദ്ധി @ കൊച്ചി എന്ന പേരിലുള്ള ജനകീയ ഹോട്ടൽ ഇന്ന് വൈകീട്ട് നാലിന് സിനിമാതാരം മഞ്ജു വാര്യർ ഉദ്ഘാടനം ചെയ്യും.
എറണാകുളം നോർത്ത് പരമാര റോഡിൽ കോർപറേഷന്റെ ഉടമസ്ഥതയിലുള്ള ലിബ്ര ഹോട്ടലാണ് ഉദ്ഘാടന വേദി. ഇവിടെയുള്ള കേന്ദ്രീകൃത അടുക്കളയിലാണ് ആഹാര പദാർത്ഥങ്ങൾ പാകം ചെയ്യുന്നത് . മിതമായ നിരക്കിൽ നഗരത്തിൽ ഏവർക്കും ഭക്ഷണം ലഭ്യമാക്കാനാണ് പദ്ധതിയിലൂടെ ലക്ഷ്യമിടുന്നത്. പത്ത് രൂപയ്ക്ക് ഇനി ഉച്ച ഭക്ഷണം കഴിക്കാം.
ഈ വർഷത്തെ കോർപറേഷൻ ബഡ്ജറ്റിൽ പ്രഖ്യാപിച്ച വിശപ്പ് രഹിത കൊച്ചി എന്ന ആശയം എൻയുഎൽഎം പദ്ധതി വഴിയാണ് നടപ്പാക്കുന്നത്. 1500 പേർക്ക് ഭക്ഷണം തയ്യാറാക്കാവുന്ന വിധത്തിലുളള ആധുനിക സംവിധാനങ്ങളോടു കൂടിയ കേന്ദ്രീകൃത കിച്ചനാണ് ഹോട്ടലിൽ തയ്യാറാക്കിയിട്ടുളളത്.
ഇവിടേക്ക് ആവശ്യമായ 20 ലക്ഷം രൂപ ചെലവ് വരുന്ന സാമഗ്രികൾ മുത്തൂറ്റ് ഫിനാൻസ് ഗ്രൂപ്പാണ് സംഭാവന ചെയ്തിരിക്കുന്നത്. സ്കൂൾ ഒഫ് ആർക്കിടെക്ട് (എസ്സിഎംഎസ്) ഹോട്ടലിന്റെ രൂപകൽപ്പന നിർവഹിച്ചു.
കൊച്ചി കോർപറേഷനിലെ കുടുംബശ്രീ പ്രവർത്തകരായ 14 വനിതകളായിരിക്കും ആദ്യഘട്ടത്തിൽ ഹോട്ടലിലെ തൊഴിലാളികൾ.
സാമ്പാർ അല്ലെങ്കിൽ ഒരു ഒഴിച്ചുകറി, തോരൻ, അച്ചാർ എന്നിവയാണ് ഊണിനുള്ള വിഭവങ്ങൾ. സ്പെഷ്യൽ ആവശ്യമുള്ളവർക്ക് അതും ലഭിക്കും. അതിന് വേറെ കാശ് നൽകണമെന്നു മാത്രം.
പ്രതികരിക്കാൻ ഇവിടെ എഴുതുക