പഴയ ഐഫോണുകളില് ഇന്ത്യക്കാരുടെ പ്രിയപ്പെട്ട ചാറ്റ് സംവിധാനമായ വാട്സാപ് വരും മാസങ്ങളില് പ്രവര്ത്തിക്കാതാകുമെന്ന് മാഷബ്ള് റിപ്പോര്ട്ടു ചെയ്യുന്നു.
വാട്സാപില് സംഭവിച്ചേക്കാവുന്ന കാര്യങ്ങളെക്കുറിച്ച് പഠിച്ചു റിപ്പോര്ട്ടുകള് തയാറാക്കുന്ന വാബിറ്റാഇന്ഫോ ഇക്കാര്യത്തെക്കുറിച്ച് നേരത്തെ സൂചിപ്പിച്ചിരുന്നു.
പഴയ ഫോണുകള് ഉപയോഗിക്കുന്ന പലര്ക്കും ഇപ്പോള്ത്തന്നെ വാട്സാപ് ഇക്കാര്യം മുന്നറിയിപ്പായി നല്കിയിട്ടുണ്ട്. കൃത്യമായി പറഞ്ഞാല് ഐഒഎസ് 10, 11 എന്നിവയില് പ്രവര്ത്തിക്കുന്ന ഐഫോണുകളിലായിരിക്കും വാട്സാപ് പ്രവര്ത്തിക്കാതാകുക.
ഓപ്പറേറ്റിങ് സിസ്റ്റം അപ്ഡേറ്റു ചെയ്യാതെ ഉപയോഗിക്കുന്ന ഐഫോണ് 5എസ്, 6, 6 പ്ലസ് തുടങ്ങിയ മോഡലുകള്ക്കായിരിക്കും പ്രശ്നം വരിക.
സന്തോഷ വാര്ത്ത എന്താണെന്നു ചോദിച്ചാല്, ഫോണുകള് അപ്ഡേറ്റു ചെയ്താല് മാത്രം മതിയാകും പ്രശ്നം തീരാന് എന്നതാണ്. അതേസമയം, ഐഫോണ് 5ല് പുതിയ മാറ്റങ്ങള് വന്നു കഴിഞ്ഞാല് വാട്സാപ് പ്രവര്ത്തിക്കില്ല.
ഐഫോണ് 7, 7 പ്ലസ് എന്നീ മോഡലുകള്ക്കൊപ്പമാണ് ഐഒഎസ് 10 പുറത്തിറക്കിയത്. ചിലർ ഓപ്പറേറ്റിങ് സിസ്റ്റം അപ്ഡേറ്റ് ചെയ്യാറില്ല. അങ്ങനെയുള്ളവര്ക്ക് പുതിയ അപ്ഡേറ്റുകള് ഉണ്ടോ എന്നു നോക്കാം.
ഉദാഹരണത്തിന് ഐഫോണ് 5എസ്, 6, 6 പ്ലസ് എന്നിവ ഉപയോഗിക്കുന്നവര്ക്ക് ഐഒഎസ് 12.5.6 വരെയുള്ള അപ്ഡേറ്റുകള് എടുക്കാം. അതുപോലെ, ഐഫോണ് X, 8, 8 പ്ലസ് മോഡലുകളുടെയും തുടക്കം ഐഒഎസ് 11ല് ആണ്.
ഈ മോഡലുകള് ഉപയോഗിക്കുന്നവരും ഏതെങ്കിലും കാരണവശാല് ഓപ്പറേറ്റിങ് സിസ്റ്റം അപ്ഡേറ്റ് ചെയ്തിട്ടില്ലെങ്കില് അവരുടെ ഫോണുകളിലും വാട്സാപ് പ്രവര്ത്തനം നിറുത്തുമെന്നാണ് സൂചന.
തങ്ങളുടെ ഫോണുകളില് സെറ്റിങ്സ്>ജനറല്>സോഫ്റ്റ്വെയര് അപ്ഡേറ്റ് എന്നതില് ചെന്ന് സോഫ്റ്റ്വെയര് അപ്ഡേറ്റ് ഉണ്ടോ എന്നു പരിശോധിക്കുക. ഉണ്ടെങ്കിൽ അപ്ഡേറ്റ് ചെയ്യുക.
വാട്സാപ് അടക്കമുള്ള ആപ്പുകളെല്ലാം കാലാകാലങ്ങളില് പരഷ്കരിച്ചുകൊണ്ടിരിക്കും. ചില പുതിയ ഫീച്ചറുകള് ചേര്ക്കുമ്പോള് പഴയ സോഫ്റ്റ്വെയറുമായി സഹകരിച്ചു പ്രവര്ത്തിക്കാന് സാധിക്കാതെ വരുന്നതാണ് ഓപ്പറേറ്റിങ് സിസ്റ്റങ്ങള് കാലഹരണപ്പെടാന് കാരണം.
ആന്ഡ്രോയിഡിലും ഐഒഎസിലും ഇത് നടക്കുന്നു. അതു കൂടാതെ പഴയ സോഫ്റ്റ്വെയര് വളരെ കുറച്ചുപേരെ ഉപയോഗിക്കുന്നുണ്ടാകൂ എന്നതിനാല്, അതുകൂടി സപ്പോര്ട്ടു ചെയ്യേണ്ട കാര്യമില്ല എന്നും കമ്പനികള് തീരുമാനിക്കുന്നു.
വാട്സാപിന്റെ കാര്യം അവിടെ നില്ക്കട്ടെ, ഐഫോണ് 5എസ്, ഐഫോണ് 6, 6 പ്ലസ്,ആദ്യ ഐപാഡ് എയര്, ഐപാഡ് മിനി, ഐപാഡ് മിനി 3, 6-ാം തലമുറയിലെ ഐപോഡ് ടച്ച് എന്നിവയ്ക്ക് പുതിയ സോഫ്റ്റ്വെയര് പാച്ച് പുറത്തുവിട്ടിരിക്കുകയാണ് ആപ്പിള്. ഗുരുതര സുരക്ഷാ വീഴ്ച കണ്ടെത്തിയതിനെ തുര്ന്നാണ് ഇത് എന്ന് ആര്സ്ടെക്നിക്കാ തുടങ്ങി വിവിധ മാധ്യമങ്ങള് റിപ്പോര്ട്ടു ചെയ്യുന്നു.
സാധാരണഗതിയില് ഓപ്പറേറ്റിങ് സിസ്റ്റങ്ങളുടെ പഴയ വേര്ഷനുകള് അപ്ഡേറ്റ് ചെയ്യാറില്ല. വെബ്കിറ്റില് കണ്ടെത്തിയ പാളിച്ചയാണ് അടിയന്തരമായി പാച്ച് ഇറക്കാന് ആപ്പിളിനെ നിര്ബന്ധിതരാക്കിയത്. മുകളില് പറഞ്ഞ ഉപകരണങ്ങള് ഉപയോഗിക്കുന്നവര് എത്രയും വേഗം ഐഒഎസ് 12.5.6 ലേക്ക് അപ്ഡേറ്റു ചെയ്യണം എന്ന് സുരക്ഷാ വിദഗ്ധരും ആവശ്യപ്പെടുന്നു.
പ്രതികരിക്കാൻ ഇവിടെ എഴുതുക