ഡെങ്കിപ്പനി, മലേരിയ പോലുള്ള ഗൗരവമേറിയ അസുഖങ്ങള് കൊതുകുകള് വഴിയാണ് പരക്കുന്നത്, ഒരു പരിധി വരെ കൊതുകുകളെ തുരത്താൻ സഹായകമാകുന്ന മൂന്ന് മാര്ഗങ്ങൾ ഇതാ
കൊതുകുനിവാരണത്തിന് പ്രധാനമായും ചെയ്യേണ്ടതുണ്ടെന്ന് ആരോഗ്യവകുപ്പ് അടക്കം നല്കാറുള്ളൊരു നിര്ദേശം തന്നെയാണ് ഇക്കൂട്ടത്തില് ആദ്യമായി പങ്കുവയ്ക്കാനുള്ളത്. വീട്ടിലോ സമീപത്തോ വെള്ളം കെട്ടിക്കിടക്കാന് അനുവദിക്കാതിരിക്കുകയെന്നതാണ് ഈ നിര്ദേശം.
പഴയ പാത്രങ്ങള്, ചിരട്ടകള്, ചെറിയ കുഴികള് തുടങ്ങി വെള്ളം കെട്ടിക്കിടക്കാനുള്ള സാധ്യതകളെല്ലാം പരിപൂര്ണമായി ഇല്ലാതാക്കുക. ഒപ്പം തന്നെ വീടും പരിസരവും ശുചിയായി സൂക്ഷിക്കുകയും ചെയ്യുക. ഇതുവഴി കൊതുകുകള്ക്ക് പെറ്റുപെരുകാനും നിലനില്ക്കാനുമുള്ള സാഹചര്യം ഇല്ലാതാകുന്നു.
കൊതുകുകടി ഒഴിവാക്കാനായി മൊസ്കിറ്റോ റിപലന്റ് ക്രീമുകള് ഉപയോഗിക്കാം. ഇത് ചര്മ്മത്തില് പ്രയോഗിക്കുന്നത് ദോഷകരമാണെന്ന് ചിന്തിക്കുന്നവര് നിരവധിയാണ്. എന്നാല് ആദ്യം ചര്മ്മത്തില് അപ്ലൈ ചെയ്ത് പരിശോധിച്ച ശേഷം മറ്റ് പ്രശ്നങ്ങളൊന്നുമില്ല എന്നുറപ്പായാല് തീര്ച്ചയായും ഇത് ഉപയോഗിക്കാവുന്നതാണ്. കിടക്കുന്നതിന് മുമ്പായി തേക്കാം. അതുപോലെ പകല്സമയങ്ങളില് പോലും ഇതുപയോഗിക്കാവുന്നതാണ്.
വിവിധ എസന്ഷ്യല് ഓയിലുകള് ഉപയോഗിക്കുന്നതും കൊതുകുകളെ അകറ്റിനിര്ത്താന് സഹായകമാണ്. ലെമണ് യൂക്കാലിപ്റ്റസ് ഓയില് (വെളിച്ചെണ്ണ ഉപയോഗിച്ച് നേര്പ്പിച്ച ശേഷം മാത്രം), പെപ്പര്മിന്റ് ഓയില് (വെജിറ്റബിള് ഓയില് ചേര്ത്ത് യോജിപ്പിച്ച ശേഷം), ലാവണ്ടര് ഓയില്, തൈം എസന്,്യല് ഓയില്, സിട്രോണല്ല സ്പ്രേ, നീം ഓയില് (വെജിറ്റബിള് ഓയില് ചേര്ത്ത് മാത്രം) എന്നിവയെല്ലാം ഇത്തരത്തില് ഉപയോഗിക്കാവുന്നതാണ്.
ഇവ ഉപയോഗിക്കുമ്പോള് ചില കാര്യങ്ങള് പ്രത്യേകം ശ്രദ്ധിക്കുക. നേര്പ്പിച്ചുപയോഗിക്കേണ്ടവ അങ്ങനെ തന്നെ ഉപയോഗിക്കണം. അതുപോലെ സ്കിന് അലര്ജിയുണ്ടോയെന്ന് ആദ്യം പരിശോധിച്ചുറപ്പ് വരുത്തിയ ശേഷം മാത്രം ഉപയോഗിക്കുക. മുറിവുകളിലോ പരിക്കുകളിലോ ഓയിലുകള് പ്രയോഗിക്കാതിരിക്കുക
പ്രതികരിക്കാൻ ഇവിടെ എഴുതുക