കുട്ടനാട് എംഎല്എ തോമസ് കെ തോമസിനെതിരെ പാര്ട്ടി നടപടി. എന്സിപി പ്രവര്ത്തക സമിതിയില് നിന്ന് തോമസ് കെ തോമസ് എംഎല്എയെ പുറത്താക്കി എന്ന റിപ്പോർട്ട് ആണ് പുറത്തു വരുന്നത്. എന്സിപിയില് ഭിന്നതയെന്ന ചര്ച്ചകള്ക്കിടെ ആണ് നടപടി എന്നതാണ് ശ്രദ്ധേയം.
മന്ത്രി എ കെ ശശീന്ദ്രന് ഉള്പ്പെടെയുള്ള നേതാക്കള് പാര്ട്ടി ദേശീയ അധ്യക്ഷന് കത്തയച്ചതിന് തൊട്ടുപിന്നാലെയാണ് നടപടി ഉണ്ടായിരിക്കുന്നത്. തോമസ് കെ തോമസ് സംഘടനാ വിരുദ്ധ പ്രവര്ത്തനങ്ങളാണ് നടത്തുന്നതെന്ന് മന്ത്രി എ കെ ശശീന്ദ്രന്, എന്സിപി സംസ്ഥാന അധ്യക്ഷന് പി സി ചാക്കോ എന്നിവര് ദേശീയ നേതൃത്വത്തെ ധരിപ്പിച്ചിരുന്നു.
അതേസമയം തനിക്കെതിരെ വധശ്രമമുണ്ടായെന്ന തോമസ് കെ തോമസ് എംഎല്എയുടെ വെളിപ്പെടുത്തലിന് പിന്നാലെ എന്സിപിയില് തര്ക്കം രൂക്ഷമായിരുന്നു. തോമസ് കെ തോമസിന് പക്വതയില്ലെന്ന് മന്ത്രി എ കെ ശശീന്ദ്രന് ആരോപിച്ചതോടെയാണ് സംസ്ഥാന എന്സിപിയിലെ ഭിന്നത കൂടുതല് വെളിവായത്. ഇതിന് പിന്നാലെ സംസ്ഥാന എന്സിപിയിലെ വിഷയങ്ങള് ചൂണ്ടിക്കാട്ടി സംസ്ഥാന നേതാക്കള് എന്സിപി ദേശീയ അധ്യക്ഷന് ശരത് പവാറിന് കത്തയയ്ക്കുകയായിരുന്നു.
പ്രതികരിക്കാൻ ഇവിടെ എഴുതുക