വിദ്യാഭ്യാസരംഗത്ത് കാലാനുസൃത മാറ്റങ്ങൾ കൊണ്ടുവരുമെന്ന് പട്ടികജാതി പട്ടികവർഗ്ഗ പിന്നോക്കക്ഷേമം, ദേവസ്വം വകുപ്പ് മന്ത്രി കെ രാധാകൃഷ്ണൻ. കുറ്റൂർ ചന്ദ്ര മെമ്മോറിയൽ ഗവ. ഹയർ സെക്കൻഡറി സ്കൂളിൽ പുതുതായി നിർമിച്ച കെട്ടിടം ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി.
സാധാരണ ജനങ്ങൾ ആശ്രയിക്കുന്ന പൊതു വിദ്യാലയങ്ങളെ മികച്ച നിലവാരത്തിൽ ഉയർത്തുന്ന പ്രവർത്തനങ്ങൾക്കാണ് സംസ്ഥാന സർക്കാർ നേതൃത്വം വഹിക്കുന്നത്. പിന്നിട്ട ഏഴു വർഷങ്ങൾക്കിടയിൽ 3800 കോടി രൂപയുടെ അടിസ്ഥാന സൗകര്യങ്ങൾ ഒരുക്കാൻ സർക്കാറിന് സാധിച്ചു. നാളത്തെ സമൂഹത്തെ നിർണയിക്കുന്നത് ഇന്നത്തെ വിദ്യാഭ്യാസമാണ്, നല്ല ഒരു സമൂഹത്തെ വാർത്തെടുക്കുന്നതിൽ പൊതുവിദ്യാലയങ്ങൾക്ക് മാതൃകാപരമായ സ്ഥാനമാണ് ഉള്ളതെന്നും മന്ത്രി പറഞ്ഞു.
സംസ്ഥാന സർക്കാരിന്റെ പൊതു വിദ്യാഭ്യാസ സംരക്ഷണ യജ്ഞനത്തിന്റെ ഭാഗമായ വിദ്യാകിരണം പദ്ധതിയിൽ ഉൾപ്പെടുത്തി കിഫ്ബി ഫണ്ടിൽ നിന്നും ഒരു കോടി രൂപ വിനിയോഗിച്ചാണ് പുതിയ കെട്ടിടം നിർമിച്ചിരിക്കുന്നത്. 22.3 ലക്ഷം രൂപ ചെലവിൽ നവീകരിച്ച കിച്ചൺ സ്റ്റോർ സമർപ്പണവും, ഉന്നത വിജയം നേടിയ വിദ്യാർത്ഥികൾക്കുള്ള ക്യാഷ് അവാർഡ് വിതരണവും ചടങ്ങിൽ നടന്നു.
പ്രതികരിക്കാൻ ഇവിടെ എഴുതുക