തിരുവനന്തപുരം: സംസ്ഥാനത്ത് സര്ക്കാര് ആശുപത്രികളില് രോഗികള്ക്ക് കാലാവധി കഴിഞ്ഞ മരുന്ന് നല്കിയതായി കണ്ട്രോളര് ഓഡിറ്റര് ജനറലിന്റെ (സിഎജി) റിപ്പോര്ട്ട്. 26 സര്ക്കാര് ആശുപത്രികളിലാണ് ഇത്തരത്തില് മരുന്നുകള് നല്കിയത്. വിതരണം മരവിപ്പിച്ച നാല് കോടിയോളം രൂപയുടെ മരുന്നുകളാണ് 2016 മുതല് 2022 വരെ ആശുപത്രികളില് എത്തിയതെന്ന് റിപ്പോര്ട്ടില് പറയുന്നു.
നിലവാരമില്ലാത്തതിനാല് വിതരണം മരവിപ്പിച്ച 3.75 കോടി രൂപയുടെ മരുന്നുകള് 483 ആശുപത്രികളിലും വിതരണം നിര്ത്തിവയ്ക്കാന് ഉത്തരവിട്ട 11.69 ലക്ഷത്തിന്റെ മരുന്നുകള് 148 ആശുപത്രികളിലും രോഗികള്ക്ക് നല്കിയെന്നാണ് കണ്ടെത്തല്. കാലാവധി കഴിഞ്ഞ മരുന്നുകളില് രാസമാറ്റം സംഭവിക്കുമെന്നതിനാല് രോഗികളുടെ ജീവന് തന്നെ അപകടത്തിലാക്കുന്നതാണ് കെഎംഎസ്സിഎല്ലിന്റെ നടപടിയെന്നും സിഎജി റിപ്പോര്ട്ടില് വിമര്ശിക്കുന്നു.
മരുന്നുകളുടെ ഗുണനിലവാരം പരിശോധിക്കുന്നതിലും മെഡിക്കല് സര്വീസ് കോര്പറേഷന് ഗുരുതരമായ അനാസ്ഥ കാണിച്ചതായും റിപ്പോര്ട്ടിലുണ്ട്. ആശുപത്രികളില് നിന്ന് ഓരോ വര്ഷത്തേക്കും ആവശ്യമുള്ള മരുന്നുകളുടെ ഇന്റന്റ് നല്കുന്നുണ്ടെങ്കിലും അതനുസരിച്ചല്ല കെഎംഎഎസ്സിഎല് മരുന്നു സംഭരിക്കുന്നതെന്നും പറയുന്നു.
പ്രതികരിക്കാൻ ഇവിടെ എഴുതുക