ഒമ്പത് ദിവസം നീണ്ടുനില്ക്കുന്ന നവരാത്രി മഹോത്സവം വ്യത്യസ്ത രീതികളിലാണ് രാജ്യത്തുടനീളം ആഘോഷിക്കപ്പെടുന്നത്. തിന്മയ്ക്കുമേല് നന്മ നേടിയ വിജയത്തെ ആഘോഷമാക്കുന്ന ഏറ്റവും ആദരണീയമായ ഹൈന്ദവ ആഘോഷങ്ങളില് ഒന്നാണ് നവരാത്രി മഹോത്സവം. നവരാത്രി വേളയില് രാജ്യത്തെ ഏതൊക്കെ നഗരങ്ങള് സന്ദര്ശനത്തിനായി തിരഞ്ഞെടുക്കാമെന്ന് നോക്കാം.
കത്ര, ജമ്മു കശ്മീര്
നവരാത്രി ഉത്സവ വേളയില് മറ്റൊരു സംസ്ഥാനത്തേക്ക് പോകാന് ആഗ്രഹിക്കുന്നുവെങ്കില് ജമ്മു കശ്മീരിലെ കത്ര തീര്ച്ചയായും സന്ദര്ശിക്കേണ്ടതാണ്. നവരാത്രി ഉത്സവ വേളയില് ഇവിടെയുള്ള മാതാ വൈഷ്ണോ ദേവി ക്ഷേത്രം പുതിയ പുഷ്പങ്ങളാലും വിളക്കുകളാലും ഭംഗിയായി അലങ്കരിച്ചിരിക്കുന്നു. നവരാത്രി ദിനങ്ങളില് ഇവിടെ വേറിട്ടൊരു ഭംഗിയുണ്ട്.
അഹമ്മദാബാദ്
നവരാത്രി ആഘോഷങ്ങള് ആരംഭിക്കുന്നത് ദുര്ഗയുടെ എല്ലാ രൂപങ്ങളുടെയും ആരതിയോടെയാണ്. തുടര്ന്ന് സ്ത്രീ-പുരുഷ ഭേദമന്യെ എല്ലാവരും നൃത്തം ചെയ്യും. തയ്യാറാക്കുന്ന ദേവീ വിഗ്രഹങ്ങള്ക്ക് ചുറ്റുമായാണ് ദണ്ഡിയ നൃത്തം ചെയ്യുന്നത്. നവരാത്രി ദിനത്തില് തീര്ച്ചയായും സന്ദര്ശിക്കേണ്ട സ്ഥലങ്ങളിലൊന്നാണ് അഹമ്മദാബാദ്.
വാരണാസി
ഘാട്ടുകളില് വിളക്കുകള് കത്തിക്കുകയും ഒമ്പത് ദിവസത്തേക്ക് നഗരത്തിലുടനീളം രാമചരിതമാനസ് ആലപിക്കുകയും ചെയ്യുന്നു. നവരാത്രി കാലത്ത് നടക്കുന്ന രാംലീലയാണ് ഏറ്റവും ആവേശകരമായ ഭാഗം. തിന്മയുടെ മേല് നന്മയെ ആഘോഷിക്കാന് അവസാന ദിവസം രാവണന്റെ കോലം കത്തിക്കുന്നിടം.
വിജയവാഡ
നവരാത്രി കാലത്ത് വിജയവാഡയിലെ കനക ദുര്ഗ്ഗാ ക്ഷേത്രത്തില് ധാരാളം നാട്ടുകാരും വിനോദസഞ്ചാരികളും എത്താറുണ്ട്. അവിടെ വിഗ്രഹം എല്ലാ ദിവസവും വ്യത്യസ്ത രൂപങ്ങളില് അണിയിച്ചൊരുക്കുന്നു. കൃഷ്ണ നദിയുടെ തീരത്താണ് ക്ഷേത്രം സ്ഥിതി ചെയ്യുന്നത്. 9 ദിവസങ്ങള്ക്ക് ശേഷം ദുര്ഗ്ഗാ മാതാവിന്റെ വിഗ്രഹം പുഷ്പങ്ങളോടൊപ്പം ഈ നദിയില് നിമജ്ജനം ചെയ്യുന്നു. ഇവിടെ നവരാത്രിയെ ബത്തുകമ്മ പാണ്ഡുഗ എന്നാണ് വിളിക്കുന്നത്.
ഉത്തരാഖണ്ഡ്
നവരാത്രി കാലത്ത് ഇവിടെ സന്ദര്ശിക്കണം. നൈനാ ദേവി, കാസര് ദേവി, ധാരി ദേവി, മാന്സ ദേവി, ചണ്ഡി ദേവി എന്നീ ക്ഷേത്രങ്ങളില് വിശേഷാല് പൂജകള് നടക്കും. അതിനാല്, ഉത്തരാഖണ്ഡ് ദേവിയുടെ അനുഗ്രഹം തേടുന്ന ഭക്തര്ക്ക് ഏറ്റവും നല്ല സ്ഥലമായി കരുതിപ്പോരുന്നു.
പശ്ചിമ ബംഗാള്
ദുര്ഗ്ഗാ പൂജ എന്ന പേര് കേള്ക്കുമ്പോള് ആദ്യം മനസ്സില് വരുന്നത് പശ്ചിമ ബംഗാളിനെ കുറിച്ചാണ്. എത്തുമ്പോള് തന്നെ നൂറുകണക്കിന് ദുര്ഗാപൂജ പന്തലുകളാല് നഗരം അലങ്കരിച്ചിരിക്കുന്നു. നവരാത്രി വന്നാലുടന് ഇവിടെ പന്തലുകള് പലതരത്തില് അലങ്കരിക്കും. ഈ സമയത്ത് ഭക്തര് ഭക്ഷണം കഴിച്ചും പൂജിച്ചും അലങ്കരിച്ചും ഉത്സവം ആഘോഷിക്കുന്നു. എല്ലാ ദിവസവും പുതിയ വസ്ത്രങ്ങള്, ചുവന്ന നെറ്റിചുട്ടി, പൂക്കള്, ആഭരണങ്ങള് എന്നിവകൊണ്ട് വിഗ്രഹങ്ങള് അലങ്കരിക്കുന്നു.
പ്രതികരിക്കാൻ ഇവിടെ എഴുതുക