വിനോദസഞ്ചാരികളുടെ ഏറ്റവും പ്രിയപ്പെട്ട വിനോദസഞ്ചാരകേന്ദ്രമായി വീണ്ടും ദുബൈ. ബാലി, ലണ്ടന്, റോം, പാരീസ്, തുടങ്ങിയ അന്താരാഷ്ട്ര പ്രസിദ്ധിയാര്ജിച്ച നഗരങ്ങളെ പിന്തള്ളിയാണ് ദുബായ് ഒന്നാം സ്ഥാനം കരസ്ഥമാക്കിയത്. ട്രാവല് ബുക്കിങ് ആന്ഡ് റിവ്യൂ പ്ലാറ്റ്ഫോമായ ട്രിപ് അഡൈ്വസര് 2024-ലെ ട്രാവലേഴ്സ് ചോയ്സ് പുരസ്കാരമാണ് ദുബൈക്ക് ലഭിച്ചിരിക്കുന്നത്.
ദുബൈ കിരീടാവകാശിയും ദുബൈ എക്സിക്യൂട്ടീവ് കൗണ്സില് ചെയര്മാനുമായ ശൈഖ് ഹംദാന് ബിന് മുഹമ്മദ് ബിന് റാഷിദ് അല് മക്തൂം തന്റെ എക്സ് അക്കൗണ്ടിലൂടെയാണ് ഇക്കാര്യം അറിയിച്ചത്. വളര്ന്നുവരുന്ന ടൂറിസം സാധ്യതകള്, തൊഴില് അവസരങ്ങള്, ബിസിനസ്, എന്നിവയെല്ലാം ദുബായിയെ ആളുകളുടെ പ്രിയപ്പെട്ട ഇടമാക്കിമാറ്റി. ബാലിയാണ് രണ്ടാം സ്ഥാനത്ത്. ലണ്ടന്, ഹനോയ് യഥാക്രമം മൂന്നും നാലും സ്ഥാനത്ത് ഇടം നേടി.
ഒന്നാം നമ്പര് ആഗോള ലക്ഷ്യസ്ഥാനമെന്ന അംഗീകാരം തുടര്ച്ചയായി മൂന്നാം വര്ഷമാണ് ദുബൈക്ക് ലഭിക്കുന്നത്. ട്രിപ് അഡ്വൈസറിലെ യാത്രക്കാരുടെ അവലോകനങ്ങളില്നിന്ന് ശേഖരിച്ച വിവരങ്ങള് ഉപയോഗിച്ച് 2022 ഒക്ടോബര് മുതല് 2023 സെപ്റ്റംബര് വരെയുള്ള 12 മാസക്കാലയളവിലെ വിലയിരുത്തലിലൂടെയാണ് ദുബൈ ഈ നേട്ടം കൈവരിച്ചത്.
പ്രതികരിക്കാൻ ഇവിടെ എഴുതുക