ഗുവാഹാട്ടി: ഇന്ത്യയുടെ ഒളിമ്പിക് മെഡല് ജേതാവും ആറുതവണ ലോക ചാമ്പ്യനുമായ മേരി കോം ബോക്സിങ്ങില്നിന്ന് വിരമിച്ചു. രാജ്യാന്തര ബോക്സിങ് അസോസിയേഷന്റെ നിയമപ്രകാരം പുരുഷ – വനിതാ ബോക്സര്മാര് എലൈറ്റ് മത്സരങ്ങളില് 40 വയസ്സ് മാത്രമേ മത്സരിക്കാന് പാടുള്ളൂ. ഇതിന്റെ അടിസ്ഥാനത്തിലാണ് 41-കാരിയായ താരം വിരമിച്ചത്.
‘ബോക്സിങ്ങിനോടുള്ള എന്റെ അഭിനിവേശം കെട്ടടങ്ങിയിട്ടില്ല. എന്നാൽ പ്രായപരിധി കാരണം രാജ്യാന്തര മത്സരങ്ങളിൽ എനിക്കു പങ്കെടുക്കാൻ സാധിക്കില്ല. ബോക്സിങ്ങിൽ നിന്നു വിരമിക്കാൻ ഞാൻ നിർബന്ധിതയായിരിക്കുന്നു. ജീവിതത്തിൽ ആഗ്രഹിച്ചതെല്ലാം നേടാൻ സാധിച്ച സംതൃപ്തിയോടെയാണ് പടിയിറക്കം’, വിരമിക്കൽ പ്രഖ്യാപനത്തിൽ മേരി കോം പറഞ്ഞു.
2014-ല് ഏഷ്യന് ഗെയിംസില് സ്വര്ണ മെഡല് നേടിയതിലൂടെ, ഏഷ്യന് ഗെയിംസില് സ്വര്ണം ഇന്ത്യയില്നിന്നുള്ള ആദ്യ വനിതാ ബോക്സറായി മാറി.
2005, 2006, 2008, 2010 വര്ഷങ്ങളില് ലോകചാമ്പ്യനായ താരം 2012-ലെ ലണ്ടന് ഒളിമ്പിക്സില് വെങ്കല മെഡലും നേടി. 2008-ല് ലോക ചാമ്പ്യനായതിനു പിന്നാലെ ഇരട്ടക്കുട്ടിളുടെ അമ്മയായി.
ഇതോടെ ബോക്സിങ്ങില്നിന്ന് തത്കാലം വിട്ടുനിന്നു. പിന്നീട് 2012-ല് മൂന്നാമത്തെ കുഞ്ഞിന് ജന്മം നല്കുന്നതിനായും കളിക്കളത്തില്നിന്ന് വിട്ടുനിന്നു. തുടര്ന്ന് തിരിച്ചെത്തിയ മേരി കോം, 2018-ല് ഡല്ഹിയില് നടന്ന ലോക ചാമ്പ്യന്ഷിപ്പും നേടി.
2003ലെ ആദ്യ ലോക ചാംപ്യൻപട്ടത്തിനു പിന്നാലെ രാജ്യം അർജുന അവാർഡ് നൽകി മേരി കോമിനെ ആദരിച്ചു. 2009ൽ ഖേൽ രത്ന പുരസ്കാരവും 2006ൽ പത്മശ്രീ, 2013ൽ പത്മഭൂഷൺ, 2020ൽ പത്മവിഭൂഷൺ അംഗീകാരങ്ങളും മേരിയെ തേടിയെത്തി. 2016– 2022ൽ രാജ്യസഭാംഗമായിരുന്നു.
പ്രതികരിക്കാൻ ഇവിടെ എഴുതുക