തിരുവനന്തപുരം: അഡീഷണല് ഗതാഗത കമ്മീഷണറും കെഎസ്ആര്ടിസി ജോയിന്റ് മാനേജിങ് ഡയറക്ടറുമായ പ്രമോജ് ശങ്കറിന് കെഎസ്ആര്ടിസി എംഡിയുടെ ചുമതല നല്കി.
കെഎസ്ആര്ടിസി സ്വിഫ്റ്റിന്റെ ചെയര്മാന് ആന്ഡ് മാനേജിങ് ഡയറക്ടറുടെ അധിക ചുമതലയും നല്കി. ഐഒഎഫ്എസ് ഉദ്യോഗസ്ഥനായ പ്രമോജ് ശങ്കര് തിരുവനന്തപുരം വെമ്പായം സ്വദേശിയാണ്.
ബിജു പ്രഭാകര് സ്ഥാനമൊഴിഞ്ഞതിനെ തുടര്ന്നാണ് നിയമനം. ഗതാഗത സെക്രട്ടറി സ്ഥാനവും ബിജു പ്രഭാകര് ഒഴിഞ്ഞിരുന്നു. ലേബര് കമ്മീഷണറും സെക്രട്ടറിയുമായ കെ.വാസുകിക്കാണ് ഗതാഗതവകുപ്പ് സെക്രട്ടറിയുടെ അധികച്ചുമതല നല്കിയിരിക്കുന്നത്.
ഗതാഗതമന്ത്രി കെ ബി ഗണേഷ് കുമാറുമായുള്ള അഭിപ്രായ ഭിന്നതയെ തുടര്ന്ന് ബിജു പ്രഭാകർ പദവിയിൽ മാറ്റം ആവശ്യപ്പെട്ടിരുന്നു. ഇതേതുടർന്ന് ബിജു പ്രഭാകറിനെ വ്യവസായ വകുപ്പിലേക്ക് മാറ്റിയിരുന്നു.
എന്നാൽ ഗണേഷ് കുമാറുമായി അഭിപ്രായ വ്യത്യാസമില്ലെന്നും കൂടുതല് ചുമതലകള് ആരോഗ്യത്തെ ബാധിക്കുന്നതിനാലാണ് കെഎസ്ആര്ടിസി എംഡി സ്ഥാനവും ഗതാഗത സെക്രട്ടറി സ്ഥാനവും ഒഴിയാന് താല്പര്യമുണ്ടെന്ന് സര്ക്കാറിനെ അറിയിച്ചതെന്നുമായിരുന്നു ബിജു പ്രഭാകറിന്റെ പ്രതികരണം.
മൂന്ന് വര്ഷവും എട്ട് മാസവും നീണ്ട സേവനത്തിന് ശേഷം കെഎസ്ആര്ടിസി സിഎംഡി പദവിയില് നിന്നും രണ്ടര വര്ഷമായി ചുമതല വഹിച്ചിരുന്ന ഗതാഗത സെക്രട്ടറി പദവിയില് നിന്നുമാണ് ബിജു പ്രഭാകര് ഐഎഎസ് ചുമതല ഒഴിഞ്ഞത്.
വ്യവസായ വകുപ്പില് മൈനിങ് ജിയോളജി, പ്ലാന്റേഷന്, കയര്, ഹാന്ഡ്ലൂം, കാഷ്യൂ വകുപ്പുകള്ക്കു പുറമേ ഗതാഗത വകുപ്പില്നിന്ന് റെയില്വേ, മെട്രോ, ഏവിയേഷന് എന്നിവയുടെ ചുമതലയും ബിജു പ്രഭാകറിന് നല്കി. ഗുരുവായൂര് ദേവസ്വം കമ്മീഷണറുടെയും കൂടല്മാണിക്യം ദേവസ്വത്തിന്റെയും ചുമതലയും നല്കിയിട്ടുണ്ട്.
പ്രതികരിക്കാൻ ഇവിടെ എഴുതുക