തിരുവനന്തപുരം: വീട്ടില് വോട്ടിന്റെ ഭാഗമായി സംസ്ഥാനത്ത് അപേക്ഷിച്ചവരില് 81 ശതമാനം പേര് വോട്ട് രേഖപ്പെടുത്തിയതായി മുഖ്യ തിരഞ്ഞെടുപ്പ് ഓഫീസര് സഞ്ജയ് കൗള് അറിയിച്ചു. മുതിര്ന്ന പൗരന്മാര്ക്കും ഭിന്നശേഷിക്കാര്ക്കും വീട്ടില് വോട്ട് ചെയ്യാന് സൗകര്യമൊരുക്കുന്ന പ്രക്രിയയില് ഇതുവരെ 1 ,42,799 പേരാണ് വോട്ടു ചെയ്തത്. 85 വയസ്സില് കൂടുതല് പ്രായമുള്ള 1,02,285 പേരും ഭിന്നശേഷിക്കാരായ 40,514 പേരും ഇതില്പ്പെടുന്നു. ഏപ്രില് 25 വരെ വീട്ടില് വോട്ട് തുടരും.
തിരഞ്ഞെടുപ്പ് പ്രക്രിയയുടെ വിശ്വാസ്യതയും സുരക്ഷയും ഉറപ്പുവരുത്തിക്കൊണ്ട് വീട്ടില് വോട്ട് പൂര്ത്തിയാക്കുന്നതിനുള്ള എല്ലാ നടപടികളും സ്വീകരിച്ചിട്ടുണ്ടെന്നും മുഖ്യ തെരഞ്ഞെടുപ്പ് ഓഫീസര് അറിയിച്ചു. പോലീസ്, മൈക്രോ ഒബ്സര്വര്, വീഡിയോഗ്രാഫര്, പോളിംഗ് ഉദ്യോഗസ്ഥര് എന്നിവര് ഉള്പ്പെട്ട സംഘമാണ് വീട്ടിലെത്തി വോട്ടു രേഖപ്പെടുത്തുക. തിരഞ്ഞെടുപ്പ് സംഘത്തിന്റെ സന്ദര്ശനം സംബന്ധിച്ച വിവരം സ്ഥാനാര്ത്ഥികളെയോ, സ്ഥാനാര്ത്ഥികളുടെ പ്രതിനിധികളെയോ മുന്കൂട്ടി അറിയിക്കും.
വോട്ടുരേഖപ്പെടുത്തിയ ബാലറ്റുകള് സീല് ചെയ്ത മെറ്റല് ബോക്സുകളില് ശേഖരിക്കുകയും പിന്നീട് സുരക്ഷിതമായി സ്ട്രോംഗ് റൂമുകളില് സൂക്ഷിക്കുകയുമാണ് ചെയ്യുന്നത്. സമ്മതിദാന അവകാശം വിനിയോഗിക്കുന്നതിന്റെ രഹസ്യ സ്വഭാവം പൂര്ണമായി നിലനിര്ത്തിക്കൊണ്ടാണ് ഈ പ്രവര്ത്തനങ്ങളെല്ലാം നടത്തിവരുന്നത്.
ഭിന്നശേഷിക്കാര്ക്കും മുതിര്ന്നപൗരന്മാര്ക്കുമായി തിരഞ്ഞെടുപ്പ് കമ്മിഷന് ഒരുക്കിയിട്ടുള്ള വീട്ടില് വോട്ട് നടപടികള് പൂര്ത്തീകരിക്കുമ്പോള് തിരഞ്ഞെടുപ്പ് പ്രക്രിയയുടെ അന്തസ്സും അന്തസത്തയും കാത്തുസൂക്ഷിക്കുന്നവിധം ജാഗ്രതയോടെ ഉദ്യോഗസ്ഥര് പ്രവര്ത്തിക്കണമെന്നും മുഖ്യതിരഞ്ഞെടുപ്പ് ഓഫിസര് പറഞ്ഞു.
പ്രതികരിക്കാൻ ഇവിടെ എഴുതുക