രാത്രിയിൽ ഹെൽമെറ്റ് ധരിക്കാതെ ബൈക്ക് പ്രകടനം നടത്തിയ യുവാക്കളോട് നടുറോഡിൽ പൊട്ടിത്തെറിച്ച് സൂര്യ. തന്റെ പുതിയ ചിത്രമായ താനാ സേർന്ത കൂട്ടത്തിന്റെ തെലുങ്ക് പതിപ്പ് ഗ്യാങ്ങിന്റെ പ്രൊമോഷനുവേണ്ടി ആന്ധ്രയിൽ എത്തിയപ്പോഴായിരുന്നു സംഭവം.
പിറ്റേ ദിവസം മാധ്യമങ്ങളോട് സംസാരിക്കവേ സൂര്യ ഈ സംഭവത്തെക്കുറിച്ച് വിവരിക്കുകയും ചെയ്തു. രാത്രിയിൽ കാറിൽ യാത്ര ചെയ്യവേയാണ് യുവാക്കളുടെ ബൈക്ക് പ്രകടനം സൂര്യ ശ്രദ്ധിച്ചത്. ഇതിനിടയിൽ ഒരു യുവാവ് സൂര്യയുടെ കാറിന്റെ ടയറിനു സമീപത്തായി വീണു. അയാൾ ഹെൽമെറ്റ് ധരിച്ചിട്ടുണ്ടായിരുന്നില്ല. ഭാഗ്യം കൊണ്ടാണ് അയാൾ രക്ഷപ്പെട്ടത്. ഇതിൽ ക്ഷുഭിതനായ സൂര്യ കാറിൽനിന്നിറങ്ങി യുവാക്കളോട് ദേഷ്യപ്പെട്ടിട്ടും ആരാധകർ അദ്ദേഹത്തെ നോക്കി ജയ് സൂര്യ എന്നു ആർത്തു വിളിക്കുകയാണ് ചെയ്തത്.
എന്നാൽ അയാൾക്ക് എന്തെങ്കിലും സംഭവിച്ചിരുന്നുവെങ്കിൽ അതെനിക്ക് ജീവിതകാലം മുഴുവനും വിഷമം ആവുമായിരുന്നുവെന്നും സൂര്യ പറഞ്ഞു. എനിക്കായി നിങ്ങളുടെ സ്നേഹം തരാം, പക്ഷേ ജീവൻ തരരുതെന്നും ജീവിതം വിലപ്പെട്ടതാനെന്നും അദ്ദേഹം പറഞ്ഞു. 25-ാം വയസ്സിൽ നിങ്ങൾക്ക് ഒരുപാട് കാര്യങ്ങൾ നേടാനുണ്ട്. കരിയറിൽ നിറയെ വിജയങ്ങൾ നേടാനുണ്ട്. ദയവ് ചെയ്ത് ബൈക്ക് ഓടിക്കുമ്പോൾ ഹെൽമെറ്റ് ധരിക്കണമെന്നും സൂര്യ കൂട്ടിച്ചേർത്തു.
പ്രതികരിക്കാൻ ഇവിടെ എഴുതുക