പതിനാലാം വയസില് ലൈംഗികാതിക്രമത്തിന് ഇരയായെന്ന നടന് ആമിര് ഖാന്റെ മകളുടെ തുറന്നുപറച്ചിലിന് നേരെ അസഭ്യ കമന്റുകള്. വിവിധ മലയാള മാധ്യമങ്ങള് നല്കിയ വാര്ത്തയ്ക്ക് താഴെയാണ് അസഭ്യകമന്റുകള് നിറഞ്ഞത്.
‘ ചെറുപ്പത്തിലേ തൊഴില് പഠിച്ചു’ എന്നായിരുന്നു സംസ്ഥാന വിദ്യാഭ്യാസ വകുപ്പിലെ മുന് അക്കൗണ്ട് ഓഫീസറായ ജോണ് കുരുവിള എന്നയാള് വാര്ത്തയ്ക്ക് താഴെ കമന്റ് ചെയ്തത്. കമന്റിനെതിരെ പ്രതിഷേധമുയര്ന്നതോടെ ഇയാള് കമന്റ് ഡിലീറ്റ് ചെയ്യുകയും ചെയ്തു.
സ്മൈലികള് ഇട്ടും ക്ലിപ്പ് ചോദിച്ചും കോമഡികള് പറഞ്ഞുമായിരുന്നു പലരും വാര്ത്തയോട് പ്രതികരിച്ചത്.
സ്ത്രീകള്ക്ക് പീഡനം വല്ല്യ കാര്യമൊന്നും അല്ലല്ലോയെന്നും ഇപ്പോള് ആണോ വെളിപ്പെടുത്താന് തോന്നിയതെന്നും പെര്ഫോമന്സ് നന്നായിട്ടുണ്ട് എന്നും പറഞ്ഞായിരുന്നു ചിലര് രംഗത്തെത്തിയത്.
ഇന്ത്യക്കാരെ ഉദ്ധരിക്കാന് ഉണ്ടാക്കിയ ‘പികെ’ സിനിമയുടെ ഷൂട്ടിംങിനായി അമീര്ഖാന് ഓടിനടക്കുവായിരുന്നത് കൊണ്ട് മകളെ ശ്രദ്ധിക്കാന് സമയം കിട്ടികാണില്ല എന്നാണ് ജോയ് എന്ജോയ് എന്ന യൂസര് പ്രതികരിച്ചത്.
ഇതിപ്പോള് ഒരു ഫാഷന് ആണെന്നും ലൈംഗിക അതിക്രമം നടന്നാല് വലിയ എന്തോ അവാര്ഡ് കിട്ടിയ പോലെ ആണ് സെലിബ്രിറ്റികള് പറയുന്നതെന്നുമായിരുന്നു മറ്റു ചിലരുടെ വാദം. വര്ഷങ്ങള് മുന്പ് അവര് ഒന്നും ചെയ്തില്ല. പിന്നെ ഇപ്പോള് പോസ്റ്റ് ഇട്ടത് കൊണ്ട് എന്താണ് കാര്യം എന്നാണ് മറ്റൊരു കമന്റ്.
സിനിമമേഖലയില് പഴയ പീഡന കഥകള് പങ്കുവെക്കുന്നത് ഇപ്പോള് ഒരു ഫാഷനായിരിക്കുന്നു. സത്യത്തില് അക്കാര്യത്തില് അവര്ക്ക് പരാതിയുണ്ടെങ്കില് അന്തസ്സായി കേസ് ഫയല് ചെയ്യണം. അല്ലാതെ മാധ്യമങ്ങളോട് വിളിച്ചു പറഞ്ഞ് ഹീറോയിന് ആകാന് ശ്രമിക്കുന്നത് പീഡനത്തെ സാമാന്യവല്ക്കരിക്കുന്നതിന് തുല്യമാണ് എന്നാണ് മറ്റു ചിലരുടെ വാദം.
ഒരാള് മറ്റൊരാളുടെ സമ്മതമില്ലാതെ പീഡനത്തിനിരയാക്കപ്പെടുന്നത് അത്ര വലിയ കാര്യമൊന്നുമല്ല എന്ന പൊതുബോധം സ്ത്രീകളില് ഉണ്ടാക്കുകയാണോ ഇരുടെ ലക്ഷ്യമെന്ന് സംശയിക്കേണ്ടിയിരിക്കുന്നു. പണ്ട് വാലുപോയ കുറുക്കന്റെ കഥ വായിച്ചവരാണല്ലോ നമ്മള് എന്നാണ് മറ്റൊരു കമന്റ്.
ഇതൊക്കെ ഉണ്ടെങ്കിലേ സിനിമയില് ചാന്സ് കിട്ടുള്ളൂവെന്നും സെലിബ്രിറ്റി എന്നൊക്കെ പറയുന്നത് ഇങ്ങനെ കിട്ടുന്ന പേരാണെന്നുമാണ് മറ്റു ചിലരുടെ കമന്റ്.
എന്നാല് ചുറ്റും ഉള്ളവരുടെ ആക്ഷേപം കേള്ക്കും എന്നറിഞ്ഞിട്ടും അവര് ഇതൊക്കെ തുറന്ന് പറയുന്നത് ആരും സുരക്ഷിതരല്ല എന്ന് പെണ്കുട്ടികള് മനസ്സിലാക്കാന് വേണ്ടി ആണെന്നും എല്ലാം തുറന്നുപറയുക തന്നെയാണ് വേണ്ടതെന്നും ചിലര് കമന്റുകള്ക്ക് മറുപടി നല്കുന്നുണ്ട്.
പ്രതികരിക്കാൻ ഇവിടെ എഴുതുക