റോഡുകളെ കുറിച്ച് ജനങ്ങള്ക്ക് പരാതി അറിയിക്കാനുള്ള പുതിയ ആപ്പിനെ പ്രശംസിച്ച് സംവിധായകന് അല്ഫോന്സ് പുത്രന്. പൊതുമരാത്ത് മന്ത്രി പി എ മുഹമ്മദ് റിയാസാണ് പുതിയ ആപ്പിന്റെ വിവരം അറിയിച്ചത്.
മന്ത്രിയുടെ പോസ്റ്റ് പങ്കുവെച്ചായിരുന്നു അല്ഫോന്സിന്റെ പ്രശംസ. ‘ഇത് നേരത്തെ വന്നിരുന്നെങ്കില് അന്ന് ഒരു അടി കുറവ് കിട്ടിയേനെ, റോണി ഫ്രം പ്രേമം. പുതിയ പദ്ധതിക്ക് എല്ലാ ആശംസകളും’ എന്നാണ് അല്ഫോന്സ് ഫേസ്ബുക്കില് കുറിച്ചത്.
പ്രേമത്തില് അല്ഫോന്സ് പുത്രനെ നിവിന് പോളിയും കൂട്ടുകാരും പോയി തല്ലുന്ന സീന് പ്രേക്ഷകര്ക്കിടയില് ഇന്നും പ്രശസ്തമാണ്. റോണി വര്ഗീസ് എന്ന കഥാപാത്രത്തെയാണ് ചിത്രത്തിന്റെ സംവിധായകന് കൂടിയായ അല്ഫോന്സ് അവതരിപ്പിച്ചത്.
‘നീ റോഡ് നന്നാക്കില്ലേഡാ, പെട്രോളിന് വില കൂട്ടുമല്ലേ’ എന്നെല്ലാം പറഞ്ഞാണ് റോണിയെ നിവിനും കൂട്ടരും തല്ലുന്നത്. ഈ രംഗത്തെയാണ് അല്ഫോന്സ് പുത്രന് പോസ്റ്റിലൂടെ ഓര്മ്മിപ്പിച്ചത്.
ഇന്നലെയാണ് പൊതുജനങ്ങള്ക്ക് റോഡുകളെ പറ്റി പരാതി അറിയിക്കാന് മൊബൈല് ആപ്പ് സംവിധാനം നടപ്പിലാക്കുമെന്ന് പൊതുമരാമത്ത് വകുപ്പ് മന്ത്രി പി എ മുഹമ്മദ് റിയാസ് അറിയിച്ചത്.
പൊതുമരാമത്ത് വകുപ്പ് റോഡുകളെ പറ്റിയുള്ള ഏത് പരാതിയും ഇനി ഈ ആപ്പിലൂടെ അറിയാക്കാം. ജൂണ് 7 മുതല് ആപ്പ് ഗൂഗിള് പ്ലേ സ്റ്റോറിലും ആപ്പിള് സ്റ്റോറിലും ലഭ്യമാവുമെന്നും മന്ത്രി പറഞ്ഞു.
ആപ്പ് വഴി ലഭിക്കുന്ന പരാതികള് എസ്എംഎസ് വഴിയും ഇമെയില് വഴിയും ബന്ധപ്പെട്ട റോഡ്സ് വിഭാഗം എഞ്ചിനീയര്മാരെ അറിയിക്കും. പരാതി പരിഹരിച്ച ശേഷം വിവരം ആപ്പില് അപ്ഡേറ്റ് ചെയ്യും. പരാതി നല്കിയവര്ക്ക് ആപ്പിലൂടെ തന്നെ തുടര്വിവരങ്ങള് അറിയാന് സാധിക്കും.
പൊതുമരാമത്ത് വകുപ്പ് നിര്മിച്ച് പരിപാലിച്ച് പോരുന്ന റോഡുകളുടെയും ആസ്തികളുടെയും ശാസ്ത്രീയമായ സംരക്ഷണത്തിനും കൃത്യമായ ധനവിനിയോഗത്തിനും വേണ്ടി നടപ്പിലാക്കുന്ന റോഡ് മൈന്റെനന്സ് മാനേജ്മെന്റ് സിസ്റ്റം (ആര്എംഎംഎസ്) പദ്ധതിയുടെ ഭാഗമായാണ് ആപ്പ് ഒരുങ്ങുന്നത്.
ശാസ്ത്രീയ രീതിയില് ഉപകരണങ്ങള് ഉപയോഗിച്ച് റോഡ് വിവരങ്ങള് സോഫ്റ്റ് വെയറുകളുടെ സഹായത്തോടെ വിശകലനം ചെയ്ത് റോഡുകളുടെ പരിപാലനം സാധ്യമാക്കുന്ന രീതിയാണിത്.
ഇതുവഴി അറ്റകുറ്റപ്പണികള് നടത്തേണ്ട റോഡുകള് കണ്ടെത്താനും നിലവില് അനുവദിച്ച പദ്ധതിവിഹിതത്തിനുള്ളില് പണികള് പൂര്ത്തിയാക്കാനും സാധിക്കും.
തെരഞ്ഞെടുത്ത 7000 കി.മി കോര് റോഡുമായി ബന്ധപ്പെട്ട മുഴുവന് വിവരങ്ങളും സിസ്റ്റത്തില് ഡിജിറ്റലൈസ് ചെയ്യും. 4000 കിലോമീറ്റര് ദൈര്ഘ്യമുള്ള പാതയുടെ വിവരങ്ങള് ഡിജിറ്റലൈസ് ചെയ്യുന്ന പ്രവര്ത്തനങ്ങള് ഉടന് പൂര്ത്തിയാക്കുമെന്നും മന്ത്രി അറിയിച്ചു.
പ്രതികരിക്കാൻ ഇവിടെ എഴുതുക