കോഴിക്കോട്: കോഴിക്കോട് നിപ പടര്ന്ന മരുതോങ്കരയില് നിന്നും ശേഖരിച്ച വവ്വാലുകളുടെ സാമ്പിളുകളില് വൈറസ് സാന്നിദ്ധ്യം സ്ഥിരീകരിച്ചു. സാമ്പിള് പരിശോധനയില് നിപ വൈറസിന്റെ ആന്റിബോഡി കണ്ടെത്തിയതായി ആരോഗ്യ വകുപ്പ് മന്ത്രി വീണ ജോര്ജ് അറിയിച്ചു. ഐസിഎംആര് ഇക്കാര്യം സ്ഥിരീകരിച്ചുവെന്നും മന്ത്രി പറഞ്ഞു.
മരുതോങ്കരയില് നിന്ന് ശേഖരിച്ച 57 സാമ്പിളുകളില് 12 എണ്ണത്തിലാണ് ആന്റിബോഡി സാന്നിദ്ധ്യം സ്ഥിരീകരിച്ചത്. പ്രത്യേക ഇനം വവ്വാലുകളില് അപൂര്വ്വമായി കണ്ടുവരുന്ന നിപ വൈറസിന്റെ വകഭേദം ഏത് രീതിയിലാണ് മനുഷ്യനിലേക്ക് എത്തുന്നത് എന്നത് സംബന്ധിച്ച് ഐസിഎംആറിനും വ്യക്തതയില്ല. നിലവില് വൈറസ് ബാധയുണ്ടായ പ്രദേശത്തെ വവ്വാലുകളില് ആന്റിബോഡി കണ്ടെത്തിയതോടെ രോഗ പ്രതിരോധ പ്രവര്ത്തനങ്ങള് ഏറെ സഹായകരമാകും.
പൊതുവില് മരണനിരക്ക് വളരെ കൂടുതലുള്ള ബംഗ്ലാദേശീയന് നിപ്പയുടെ വകഭേദമാണ് കേരളത്തില് കണ്ടുവന്നത്. സാധാരണ രോഗബാധിതരാകുന്നവരില് 70 ശതമാനം മുതല് 90 ശതമാനം വരെ ആളുകളുടെ മരണത്തിന് കാരണമാകാവുന്ന വൈറസ് വകഭേദമാണിത്.
ഇത്തവണ കോഴിക്കോട് ഉണ്ടായ രോഗാണുബാധയില് ആറുപേരില് രണ്ടു പേരാണ് മരണപ്പെട്ടത്. 33.3 ശതമാനമായിരുന്നു മരണ നിരക്ക്.
പ്രതികരിക്കാൻ ഇവിടെ എഴുതുക