കൊച്ചി: കളമശ്ശേരി സ്ഫോടനക്കേസിലെ പ്രതി ഡൊമനിക് മാര്ട്ടിനെ ഇന്ന് കോടതിയില് ഹാജരാക്കും. ജില്ലാ സെഷന്സ് കോടതിയിലാണ് ഹാജരാക്കുക. യുഎപിഎ നിയമത്തിന് പുറമേ കൊലപാതകം വധശ്രമം അടക്കമുള്ള വകുപ്പുകള് ചുമത്തിയാണ് കേസ്. പ്രതിയുടെ വിദേശ ബന്ധം സംബന്ധിച്ച് കേന്ദ്ര ഏജന്സികളുടെ പരിശോധന തുടരുകയാണ്. അന്വേഷണം എന് ഐ എ ഏറ്റെടുക്കുമെന്നാണ് സൂചന.
ലഭ്യമായ തെളിവുകള് വെച്ച് പ്രതി ഒറ്റക്കാണ് കൃത്യം ചെയ്തതെന്നും കുറ്റസമ്മത മൊഴിയുണ്ടെന്നുമാണ് പോലീസ് വ്യക്തമാക്കുന്നത്. കൂടുതല് പേരുടെ പങ്കാളിത്തം ഇതുവരെ കണ്ടെത്താനായിലെന്നും പോലീസ് വ്യക്തമാക്കിയിട്ടുണ്ട്.
സ്ഫോടനത്തില് പരിക്കേറ്റ് 21 പേരാണ് ചികിത്സയില് കഴിയുന്നത്. 16 പേര് ഐസിയുവില് ചികിത്സയിലാണ്. മൂന്ന് പേരുടെ നില ഗുരുതരമാണെന്നും 10 ശതമാനം പൊള്ളലേറ്റ 14 വയസുള്ള കുട്ടിയെ വാര്ഡിലേക്ക് മാറ്റിയെന്നും മെഡിക്കല് ബുള്ളറ്റിനില് പറയുന്നു. പരിക്കേറ്റവരുടെ എല്ലാവരുടെയും ചികിത്സാ ചെലവ് സര്ക്കാര് വഹിക്കുമെന്ന് മുഖ്യമന്ത്രി അറിയിച്ചു.
പ്രതികരിക്കാൻ ഇവിടെ എഴുതുക