കാഠ്മണ്ഡു: നേപ്പാളില് വെള്ളിയാഴ്ച അര്ദ്ധരാത്രിയോടെ ശക്തമായ ഭൂചലനമുണ്ടായി. 69 പേര് മരണപ്പെട്ടതായാണ് റിപ്പോര്ട്ട്. റിക്ടര് സ്കെയിലില് 6.4 തീവ്രത രേഖപ്പെടുത്തിയ ഭൂചലനം ഡല്ഹി ഉള്പ്പെടെ ഇന്ത്യയുടെ വിവിധ ഭാഗങ്ങളിലും അനുഭവപ്പെട്ടു. ഭൂചലനത്തില് നിരവധിപ്പേര്ക്ക് പരിക്കേല്ക്കുകയും ചെയ്തു. രണ്ട് തവണയായി 40 സെക്കന്ഡുകള് നീണ്ടു നിന്ന ഭൂചലനമാണുണ്ടായത്.
നേപ്പാളില് മരണ സംഖ്യ ഉയരാന് സാധ്യതയുണ്ടെന്നാണ് പുറത്തു വരുന്ന റിപ്പേര്ട്ടുകള്. വിവിധ പ്രദേശങ്ങളുമായുള്ള ആശയ വിനിമയം സാധ്യമാവാത്തതിനാല് കൃത്യമായ വിവരങ്ങള് ലഭ്യമായിട്ടില്ല. പടിഞ്ഞാറന് നേപ്പാളിലെ ജജാര്കോട്ട് ജില്ലയിലുള്ള റാമിഡന്ഡ ഗ്രാമത്തിലാണ് പ്രാദേശിക സമയം രാത്രി 11.47ഓടെ ഭൂചലനമുണ്ടായത്.
പരിക്കേറ്റവരുടെ അടിയന്തിര രക്ഷാപ്രവര്ത്തനത്തിനായി മൂന്ന് സുരക്ഷാ ഏജന്സികള്ക്കും നിര്ദേശം നല്കിയതായും നേപ്പാള് പ്രധാനമന്ത്രി പുഷ്പ കമാല് ദഹാല് അറിയിച്ചു. നേപ്പാളിലെ രണ്ട് ജില്ലകളെയാണ് ഭൂചലനം ബാധിച്ചത്. ജജാര്കോട്ട് ജില്ലയില് 26 പേര് മരിച്ചതായി ജില്ലാ മേധാവി സുരേഷ് സുനാര് വാര്ത്താ ഏജന്സിയായ എ.എഫ്.പിയോട് പറഞ്ഞു.
നിരവധി വീടുകളും കെട്ടിടങ്ങളും തകര്ന്നു വീണതായും പലരും കെട്ടിടങ്ങളുടെ അവശിഷ്ടങ്ങള്ക്കിടയില് കുടുങ്ങിക്കിടക്കുന്നതായും റോഡുകള് തകര്ന്ന് ഗതാഗത മാര്ഗങ്ങളും ആശയ വിനിമയ സംവിധാനങ്ങളും തകരാറിലായതായാണ് റിപ്പോര്ട്ടുകള്. ഡല്ഹിയിലും ശക്തമായ പ്രകമ്പനം അനുഭവപ്പെട്ടതായി ജനങ്ങള് പറഞ്ഞു. അര്ദ്ധരാത്രി പലരും ഉറക്കത്തിലായിരുന്ന സമയത്താണ് ഭൂചലനം അനുഭവപ്പെട്ടത്. യുപി,ഡല്ഹി, ബിഹാര് എന്നീ സംസ്ഥാനങ്ങളിലും പ്രകമ്പനം അനുഭവപ്പെട്ടു.
പ്രതികരിക്കാൻ ഇവിടെ എഴുതുക