തിരുവനന്തപുരം: സംസ്ഥാനത്ത് അടുത്ത അഞ്ചുദിവസം ഇടിമിന്നലോടു കൂടിയ മഴയ്ക്ക് സാധ്യതയെന്ന് കേന്ദ്ര കാലാവസ്ഥാ വകുപ്പ്. മഴയ്ക്കൊപ്പം മണിക്കൂറില് 30 മുതല് 40 കിലോമീറ്റര് വരെ വേഗതയില് വീശിയേക്കാവുന്ന ശക്തമായ കാറ്റിനും സാധ്യതയുണ്ട്. തെക്കന് തായ്ലന്ഡിനും തെക്കന് ആന്ഡമാന് കടലിനും മുകളിലായി ചക്രവാതച്ചുഴി സ്ഥിതിചെയ്യുന്നുണ്ട്.
തിങ്കളാഴ്ചയോടെ ഇത് തെക്കന് ആന്ഡമാന് കടലിനും തെക്കുകിഴക്കന് ബംഗാള് ഉള്ക്കടലിനും മുകളിലായി ന്യൂനമര്ദമായി ശക്തി പ്രാപിക്കാന്
സാധ്യതയുണ്ട്. തുടര്ന്ന് പടിഞ്ഞാറ് – വടക്കു പടിഞ്ഞാറ് ദിശയില് സഞ്ചരിച്ച് ബുധനാഴ്ചയോടെ തെക്കുകിഴക്കന് ബംഗാള് ഉള്ക്കടലില് തീവ്രന്യൂനമര്ദമായി ശക്തിപ്രാപിക്കാന് സാധ്യതയുണ്ടെന്നും കാലാവസ്ഥാ വകുപ്പ് അറിയിച്ചു. കേരള – കര്ണാടക – ലക്ഷദ്വീപ് തീരങ്ങളില് മത്സ്യബന്ധനത്തിന് തടസമില്ലെന്നും കേന്ദ്ര കാലാവസ്ഥാ വകുപ്പ് അറിയിച്ചു.
തിങ്കളാഴ്ച മുതല് വ്യാഴാഴ്ച വരെ തെക്കന് ആന്ഡമാന് കടലിലും അതിനോട് ചേര്ന്ന വടക്കന് ആന്ഡമാന് കടലിലും മണിക്കൂറില് 40 മുതല് 45 കിലോമീറ്റര് വരെയും ചില അവസരങ്ങളില് മണിക്കൂറില് 55 കിലോമീറ്റര് വരെയും വേഗതയില് ശക്തമായ കാറ്റിനും മോശം കാലാവസ്ഥയ്ക്കും സാധ്യതയെന്നും മുന്നറിയിപ്പുണ്ട്.
പ്രതികരിക്കാൻ ഇവിടെ എഴുതുക