ഗാസ: ഹമാസിന്റെ ഏറ്റവും വലിയ തുരങ്കം കണ്ടെത്തിയതായി ഇസ്രയേല് പ്രതിരോധ സേന. ഇസ്രയേലുമായുള്ള അതിര്ത്തിക്ക് സമീപം വടക്കന് ഗാസയിലുള്ള തുരങ്കമാണ് കണ്ടെത്തിയതെന്ന് ഐഡിഎഫ് അറിയിച്ചു. നാല് കിലോമീറ്ററിലധികം ദൂരത്തില് വ്യാപിച്ചു കിടക്കുന്ന തുരങ്കത്തിന്റെ ചില പ്രദേശങ്ങള് ഏകദേശം 50 മീറ്ററോളം ഭൂമിക്കടിയിലേക്കുണ്ടെന്നും ഇസ്രയേല് സേന വ്യക്തമാക്കി. ഇസ്രയേല് അതിര്ത്തിക്ക് 400 മീറ്റര് മാത്രം അകലത്തിലാണ് തുരങ്കമുള്ളത്.
തുരങ്കത്തില് നിന്നുള്ള ദൃശ്യങ്ങളും ഇസ്രയേല് പുറത്ത് വിട്ടിട്ടുണ്ട്. എന്നാല് തുരങ്കത്തിലൂടെ ഇസ്രയേലിലേക്ക് കടക്കാനാകില്ലെന്നും ഇവര് കൂട്ടിച്ചേര്ത്തു. നിരവധി ശാഖകളും ജങ്ഷനുകളും ഉള്ള ഈ തുരങ്കത്തില് വൈദ്യുതി കണക്ഷനും മറ്റു ആശയവിനിമയ സംവിധാനങ്ങളും ഉണ്ട്. തുരങ്കത്തിന്റെ ചില ഭാഗങ്ങളില് സ്ഫോടനമടക്കം ചെറുക്കാന് സാധിക്കുന്ന വലിയ കവാടങ്ങളുണ്ട്. ഇത് ഇസ്രയേല് സൈന്യം പ്രവേശിക്കുന്നത് തടയാന് ഉദ്ദേശിച്ചിട്ടുള്ളതാകാമെന്നും ഐഡിഎഫ് വ്യക്തമാക്കി.
പ്രതികരിക്കാൻ ഇവിടെ എഴുതുക