വിനോദസഞ്ചാര കേന്ദ്രങ്ങളായ ഊട്ടിയും കൊടൈക്കനാലും സന്ദർശിക്കാനുള്ള ഇ–പാസ് ഇന്ന് മുതൽ പ്രാബല്ല്യത്തിൽ വരും. epass.tnega.org എന്ന വെബ്സൈറ്റ് വഴി ഇ-പാസിന് രജിസ്റ്റര്ചെയ്യാം. ടൂറിസ്റ്റ് വാഹനങ്ങള്ക്കും വാണിജ്യവാഹനങ്ങള്ക്കും ഇ-പാസ് വേണം. പാസില്ലാത്ത വാഹനങ്ങളെ പ്രവേശിപ്പിക്കില്ല. എവിടെയാണു താമസിക്കുന്നത്, എത്ര ദിവസം തങ്ങും തുടങ്ങിയ വിവരങ്ങളും നൽകണം. ഇന്ന് രാവിലെ 6 മുതൽ അപേക്ഷിച്ചു തുടങ്ങാം.
അപേക്ഷിക്കുന്നവര് പേരും മേല്വിലാസവും ഫോണ് നമ്പറും നല്കണം. എത്രദിവസം താമസിക്കുന്നും ഏത് വാഹനമാണ് ഉപയോഗിക്കുന്നതെന്നും എഴുതണം. വിദേശ ടൂറിസ്റ്റുകള്ക്ക് അവരുടെ ഇ-മെയില് ഐ.ഡി. ഉപയോഗിച്ച് രജിസ്റ്റര്ചെയ്യാം.
ഊട്ടിയിലേക്ക് പോകുന്ന മലയോരപാതകളില് വാഹനങ്ങളുണ്ടാക്കുന്ന ഗതാഗതക്കുരുക്ക് ശ്രദ്ധയില്പ്പെട്ടതിനെത്തുടര്ന്ന് മദ്രാസ് ഹൈക്കോടതിയാണ് ഇ-പാസ് നിര്ബന്ധമാക്കിയത്. ഇ-പാസ് ഇന്ന് മുതല് ജൂണ് 30 വരെയുള്ള കാലയളവിലേക്കാണ് നിര്ബന്ധമാക്കിയത്. വ്യവസ്ഥകള്ക്ക് വിധേയമായി അപേക്ഷിക്കുന്നവര്ക്കെല്ലാം ഇ-പാസ് ലഭിക്കുമെന്ന് നീലഗിരി കളക്ടര് എ. അരുണ പറഞ്ഞു.
വെബ്സൈറ്റില് രജിസ്റ്റര്ചെയ്യുന്ന ടൂറിസ്റ്റ് വാഹനങ്ങളിലെയും വാണിജ്യവാഹനങ്ങളിലെയും ഡ്രൈവര്മാര്ക്ക് ക്യു.ആര്. കോഡ് അവരുടെ മൊബൈല്ഫോണില് ലഭിക്കും. പ്രവേശന കവാടത്തില്വെച്ച് ക്യു.ആര്. കോഡ് സ്കാന് ചെയ്തശേഷം കടത്തിവിടും.
ഒരു വാഹനത്തിന് ഒരു ഇ-പാസ് മതിയാകും. വാഹനത്തില് യാത്രചെയ്യുന്ന എല്ലാവര്ക്കും ഇ-പാസ് വേണ്ട. ഒരുതവണ ഇ-പാസിന് രജിസ്റ്റര്ചെയ്ത് യാത്ര പൂര്ത്തിയാക്കിയ വാഹനത്തിന് വീണ്ടും ഊട്ടി, കൊടൈക്കനാല് എന്നിവിടങ്ങളിലേക്ക് പോകണമെങ്കില് വീണ്ടും ഇ-പാസെടുക്കണം.
തിരക്ക് നിയന്ത്രിക്കുകയെന്ന ലക്ഷ്യത്തോടെയാണിത്. സര്ക്കാര്ബസുകളില്ക്കയറി പോകുന്നവര്ക്ക് ഇ-പാസിന്റെ ആവശ്യമില്ല. അവരുടെ എണ്ണം തമിഴ്നാട് ട്രാന്സ്പോര്ട്ട് കോര്പ്പറേഷനില്നിന്നെടുക്കുമെന്ന് അധികൃതര് പറഞ്ഞു. ഊട്ടിയിൽ ദിവസേന 1,300 വലിയ വാഹനങ്ങൾ ഉൾപ്പെടെ 20,000 വാഹനങ്ങൾ എത്തുന്നത് പരിസ്ഥിതിക്കും പ്രദേശവാസികൾക്കും മൃഗങ്ങൾക്കും ദോഷകരമാണെന്ന് കോടതി നിരീക്ഷിച്ചിരുന്നു.
പ്രതികരിക്കാൻ ഇവിടെ എഴുതുക