‘ഷെഫീക്കിന്റെ സന്തോഷം’ എന്ന സിനിമയില് അഭിനയിച്ചതിന് പ്രതിഫലം നല്കിയില്ലെന്ന ബാലയുടെ ആരോപണം ശരിയില്ലെന്ന് ചിത്രത്തിന്റെ നിര്മാതാക്കള്. ചിത്രത്തില് പ്രവര്ത്തിച്ച ഒരാള്ക്ക് പോലും പ്രതിഫലം കൊടുക്കാതിരുന്നില്ല എന്നും ചിത്രത്തിന്റെ ലൈൻ പ്രൊഡ്യൂസറായ വിനോദ് മംഗലത്ത് പറഞ്ഞു.
തന്റെ സഹോദരനായ ഉണ്ണി മുകുന്ദൻ നിര്മിക്കുന്ന ചിത്രമായതിനാല് പ്രതിഫലം വേണ്ടെന്ന് പറഞ്ഞാണ് ബാല സിനിമയില് അഭിനയിക്കാൻ തയ്യാറായത്. എന്നാല് രണ്ട് ലക്ഷം രൂപ ബാലയ്ക്ക് പ്രതിഫലമായി നല്കിയെന്നും വിനോദ് മംഗലത്ത് പറഞ്ഞു.
മനോജ് കെ ജയനെ ആയിരുന്നു ബാല ചെയ്ത വേഷത്തിലേക്ക് ആദ്യം തീരുമാനിച്ചിരുന്നത്. എന്നാല് ഡേറ്റ് പ്രശ്നത്തെ തുടര്ന്ന് മനോജ് കെ ജയന് ചിത്രത്തില് അഭിനയിക്കാനായില്ല. വളരെ പ്രധാനപ്പെട്ട ഒരു കഥാപാത്രമായിരുന്നതിനാല് അത് ആരു അവതരിപ്പിക്കും എന്ന് സംവിധായകനമടക്കമുള്ളവര് ചര്ച്ച ചെയ്തു. ബാല അവതരിപ്പിച്ചാല് നല്ലതാകില്ലേ എന്ന നിര്ദ്ദേശം മുന്നോട്ടുവച്ചത് ഉണ്ണി മുകുന്ദനായിരുന്നു. ബാല വളരെ സന്തോഷത്തോടെ ഷെഫീക്കിന്റെ സന്തോഷത്തില് അഭിനയിക്കാൻ തയ്യാറാകുകയും ചെയ്തു. അദ്ദേഹം മികച്ച രീതിയില് ചെയ്തു. അതിന് അദ്ദേഹത്തോട് നന്ദി ഉണ്ടെന്നും വിനോദ് മംഗലത്ത് പറഞ്ഞു.
പ്രതികരിക്കാൻ ഇവിടെ എഴുതുക