എണ്ണയിൽ വറുത്ത ഭക്ഷണങ്ങൾ പതിവായി കഴിക്കുന്നത് ആരോഗ്യത്തിന് നല്ലതല്ലെന്ന് ഡോക്ടർമാർ പറയാറുണ്ട്. എന്നാൽ എണ്ണയിൽ വറുത്ത ഭക്ഷണത്തിൽ അനാരോഗ്യകരമെന്ന് പറയുന്നതിന് കാരണം എന്താണെന്ന് പലപ്പോഴും നാം ചിന്തിക്കാറില്ല. എന്നാണ് വറുത്ത ഭക്ഷണങ്ങൾ കഴിച്ചാൽ എന്താണ് ശരീരത്തിൽ സംഭവിക്കുന്നത് എന്ന് നോക്കാം.
വറുത്ത ഭക്ഷണങ്ങൾ കഴിക്കുന്നത് സ്ട്രോക്ക്, ഹൃദയാഘാതം എന്നിവയ്ക്കുള്ള സാധ്യത വർദ്ധിപ്പിക്കും എന്നാണ് പഠനങ്ങൾ പറയുന്നത്. കൊഴുപ്പ് കൂടുതലുള്ള ഭക്ഷണം കഴിക്കുന്നത് ശരീരഭാരം വർദ്ധിപ്പിക്കാനും അമിതവണ്ണത്തിനും ഇടയാക്കും. അമിതവണ്ണം പല രോഗങ്ങൾക്കും ആരോഗ്യ പ്രശ്നങ്ങൾക്കും കാരണമാകുന്നു.
ഭക്ഷണം വറുക്കുമ്പോൾ അതിൽ എണ്ണയുടെ കൊഴുപ്പ് കൂടുതലായി ആഗിരണം ചെയ്യപ്പെടുന്നതിനാൽ അത് കൂടുതൽ കലോറി അടങ്ങിയതായി മാറും. കൊഴുപ്പ് നിറഞ്ഞ ഭക്ഷണം ധാരാളം കഴിക്കുന്നത് രക്തസമ്മർദ്ദം വർദ്ധിപ്പിക്കുകയും ഉയർന്ന കൊളസ്ട്രോൾ ഉണ്ടാക്കുകയും ചെയ്യും. ഇവ രണ്ടും ഹൃദ്രോഗത്തിന് കാരണമാവുന്ന കാര്യങ്ങൾ ആണ്.
അമേരിക്കൻ ജേണൽ ഓഫ് ക്ലിനിക്കൽ ന്യൂട്രീഷനിൽ 2014-ൽ പ്രസിദ്ധീകരിച്ച ഒരു പഠനത്തിൽ, പതിവായി വറുത്ത ഭക്ഷണം കഴിക്കുന്നത് ടൈപ്പ് 2 പ്രമേഹം വികസിപ്പിക്കുന്നതിനുള്ള അപകടസാധ്യതയുമായി ബന്ധപ്പെട്ടിരിക്കുന്നുവെന്ന് കണ്ടെത്തി. ഹാർവാർഡ് സ്കൂൾ ഓഫ് പബ്ലിക് ഹെൽത്തിലെ ഗവേഷകർ 25 വർഷത്തിനിടെ 100,000-ത്തിലധികം പുരുഷന്മാരുടെയും സ്ത്രീകളുടെയും ഡാറ്റ പരിശോധിച്ചതിന് ശേഷം സമാനമായ ഫലങ്ങൾ കണ്ടെത്തിയിരുന്നു.
ആഴ്ചയിൽ നാലോ അഞ്ചോ തവണ വറുത്ത ഭക്ഷണങ്ങൾ കഴിക്കുന്നവർക്ക് ടൈപ്പ് 2 പ്രമേഹം വരാനുള്ള സാധ്യത 39% കൂടുതലാണെന്നും പഠനത്തിൽ പറയുന്നു. സംസ്കരിച്ച മാംസം, അമിതമായി വേവിച്ച ഭക്ഷണങ്ങൾ, വറുത്ത ഭക്ഷണങ്ങൾ എന്നിവ ചിലതരം ക്യാൻസർ സാധ്യത വർദ്ധിപ്പിക്കും. കാരണം, ഈ ഭക്ഷണങ്ങളിൽ ക്യാൻസറിന് കാരണമാകുന്ന കാർസിനോജനുകൾ അല്ലെങ്കിൽ സംയുക്തങ്ങൾ അടങ്ങിയിട്ടുള്ളതായി പഠനങ്ങൾ പറയുന്നു.
പ്രതികരിക്കാൻ ഇവിടെ എഴുതുക