ഗാസ: ഹമാസ് ബന്ദികളാക്കിയിരുന്ന അമേരിക്കന് പൗരന്മാരായ അമ്മയെയും മകളെയും വിട്ടയച്ചു. മാനുഷിക പരിഗണനയുടെ പേരിലാണ് രണ്ടുപേരെയും മോചിപ്പിച്ചതെന്ന് ഹമാസ് അറിയിച്ചു. അന്തര് ദേശീയ മാധ്യമങ്ങളാണ് ഇക്കാര്യം റിപ്പോര്ട്ട് ചെയ്തത്. ഖത്തറിന്റെ മധ്യസ്ഥതയില് നടന്ന ചര്ച്ചയിലാണ് മോചന തീരുമാനമുണ്ടായത്.
അമേരിക്കന് പൗരന്മാരായ 59-കാരി ജൂഡിത്ത് റാനന്, 18-കാരി മകള് നേറ്റലി റാനന് എന്നിവരെയാണ് ഗാസയിലെ റെഡ് ക്രോസ് സംഘത്തിന് ഹമാസ് കൈമാറിയത്. ഇവരെ ഇസ്രയേലിലെ സൈനിക കേന്ദ്രത്തില് എത്തിച്ചു. ഇരുവരെയും മോചിപ്പിച്ച വിവരം അമേരിക്കയും സ്ഥിരീകരിച്ചു. യുഎസ് എംബസിയില് നിന്നുള്ള സംഘം ഇരുവരെയും ഉടന് നേരില് കാണുമെന്ന് യുഎസ് സ്റ്റേറ്റ് സെക്രട്ടറി പറഞ്ഞു.
അതേസമയം, ഗാസയിലെ അല് ഖുദ്സ് ആശുപത്രിയില് നിന്ന് എല്ലാവരും ഒഴിഞ്ഞ് പോകണമെന്ന് ഇസ്രയേല് മുന്നറിയിപ്പ് നല്കിയിട്ടുണ്ട്. പലസ്തീനിയന് റെഡ് ക്രസന്റ് സൊസൈറ്റിയാണ് ഇക്കാര്യം അറിയിച്ചത്. 400ഓളം ഗുരുതര രോഗികളും അഭയം തേടിയെത്തിയ 12,000 സാധാരണക്കാരും നിലവില് ആശുപത്രിയില് കഴിയുന്നുണ്ട്. എല്ലാവരും ഉടന് ഒഴിയണമെന്നാണ് ഇസ്രയേല് ആവശ്യപ്പെട്ടതെന്ന് റെഡ് ക്രസന്റ് പ്രതിനിധി പറഞ്ഞു. അല് അഹ്ലി ആശുപത്രിയില് സംഭവിച്ചത് പോലൊരു കൂട്ടക്കൊല തടയാന് അന്താരാഷ്ട്ര സമൂഹം ഉടനടി അടിയന്തര നടപടി സ്വീകരിക്കണണമെന്ന് റെഡ് ക്രസന്റ് അഭ്യര്ത്ഥിച്ചു.
പ്രതികരിക്കാൻ ഇവിടെ എഴുതുക