തിരുവനന്തപുരം: ഗതാഗത നിയമലംഘനങ്ങള്ക്ക് പിഴ അടച്ചില്ലെങ്കില് ഡിസംബര് ഒന്നുമുതല് പുക പരിശോധനാ സര്ട്ടിഫിക്കറ്റ് ലഭിക്കില്ലെന്ന് ഗതാഗത വകുപ്പ്. പിഴക്കുടിശ്ശിക ഇല്ലാത്ത വാഹനങ്ങള്ക്ക് മാത്രമേ ഡിസംബര് ഒന്ന് മുതല് പുക പരിശോധനാ സര്ട്ടിഫക്കറ്റ് നല്കുകയുള്ളു. ഗതാഗത മന്ത്രി ആന്റണി രാജുവിന്റെ അധ്യക്ഷതയില് ചേര്ന്ന റോഡ് സുരക്ഷാ അവലോകന യോഗമാണ് തീരുമാനമായത്.
ക്യാമറകള് പ്രവര്ത്തനം ആരംഭിച്ച ജൂണ് അഞ്ച് മുതല് ഒക്ടോബര് വരെ 74,32,371 ഗതാഗത നിയമലംഘനങ്ങളാണ് കണ്ടെത്തിയത്. ഇതില് 58,29,926 എണ്ണം പരിശോധിച്ചു. ഇതില് 23,06,023 കേസുകള് ഇന്റഗ്രേറ്റഡ് ട്രാന്സ്പോര്ട്ട് മോണിറ്ററിങ് സിസ്റ്റത്തില് അപ്ലോഡ് ചെയ്യുകയും 2,103,801 ചെല്ലാനുകള് തയ്യാറാക്കുകയും ചെയ്തു. 139 കോടിയിലധികം രൂപ പിഴ ചുമത്താവുന്ന നിയമലംഘനങ്ങളാണ് ഈ കാലയളവില് നടന്നത്. ഏകദേശം 21.5 കോടി രൂപ ഇതിനകം പിഴയായി ലഭിച്ചിട്ടുണ്ട്.
ഹെല്മറ്റ് ധരിക്കാതെ ഇരുചക്ര വാഹനങ്ങളോടിച്ചതാണ് ഒക്ടോബര് മാസത്തിലെ ഏറ്റവും കൂടുതല് നിയമലംഘനങ്ങള് കണ്ടെത്തിയത്. 21,865 നിയമലംഘനങ്ങളാണ് നടന്നത്. സഹയാത്രികര് ഹെല്മെറ്റ് ധരിക്കാതെ യാത്രചെയ്തത് 16,581. കാറിലെ മുന് സീറ്റ് യാത്രക്കാര് സീറ്റ് ബെല്റ്റ് ധരിക്കാത്തത്-23,296, കാര് ഡ്രൈവര് സീറ്റ് ബെല്റ്റ് ധരിക്കാത്തത്- 25,633, മൊബൈല് ഫോണ് ഉപയോഗം-662, ഇരുചക്ര വാഹനങ്ങളിലെ ട്രിപ്പിള് റൈഡ്- 698 തുടങ്ങിയവയാണ് ഒക്ടോബര് മാസം കണ്ടെത്തിയ നിയമ ലംഘനങ്ങള്.
പ്രതികരിക്കാൻ ഇവിടെ എഴുതുക