കൊച്ചി: നടിയെ ആക്രമിച്ച കേസില് ദൃശ്യങ്ങളടങ്ങിയ മെമ്മറികാര്ഡിലെ ഹാഷ് വാല്യു മാറിയ സംഭവത്തില് കോടതി മേല്നോട്ടത്തില് സമഗ്ര അന്വേഷണം ആവശ്യപ്പെട്ട് അതിജീവിത സമര്പ്പിച്ച ഹര്ജിയില് ഹൈക്കോടതി ഇന്ന് വിധി പറയും. അതിജീവിത നല്കിയ ഹര്ജി ജസ്റ്റിസ് കെ ബാബുവിന്റെ ബെഞ്ചാണ് പരിഗണിക്കുന്നത്.
വിചാരണ കോടതിയുടെ കസ്റ്റഡിയില് ഇരിക്കെ ദൃശ്യങ്ങള് ഉള്പ്പെട്ട മെമ്മറി കാര്ഡിന്റെ ഹാഷ് വാല്യു മാറിയെന്നതിന് ഫോറന്സിക് റിപ്പോര്ട്ട് തെളിവായുണ്ടെന്നാണ് പ്രധാന വാദം. ഹാഷ് വാല്യു മാറിയത് ആരെങ്കിലും ദൃശ്യം പരിശോധിച്ചത് കൊണ്ടാകാമെന്നും അപകീര്ത്തികരമായ ദൃശ്യങ്ങള് പുറത്ത് പോകുന്നത് തന്റെ സ്വകാര്യതയെ ബാധിക്കുമെന്നും ഹര്ജിയില് അതിജീവിത ചൂണ്ടിക്കാട്ടിയിരുന്നു. വിവിതതലങ്ങളില് വാദം കേട്ടതിന് ശേഷമാണ് അന്വേഷണം വേണമോ വേണ്ടയോ എന്നത് സംബന്ധിച്ച് ഹൈക്കോടതി ഇന്ന് ഉത്തരവ് പുറപ്പെടുവിക്കുന്നത്.
2018 ജനുവരി 9നും ഡിസംബര് 13നുമാണ് ആദ്യം ഹാഷ് വാല്യു മാറിയതെന്നും പിന്നീട് 2021 ജൂലൈയിലും ഹാഷ് വാല്യു മാറിയതായും ഫോറന്സിക് പരിശോധന ഫലത്തില് കണ്ടെത്തിയിരുന്നു. മെമ്മറി കാര്ഡിലെ വിവരങ്ങള് സുരക്ഷിതമാണെന്ന് ഉറപ്പാക്കേണ്ടതുണ്ടെന്ന് സര്ക്കാരും കോടതിയെ അറിയിച്ചിരുന്നു. അതേസമയം, വിചാരണ നീട്ടിക്കൊണ്ടുപോകാനാണ് നടിയുടെ ശ്രമമെന്നും ഹര്ജി തള്ളണമെന്നും കേസിലെ പ്രതിയായ നടന് ദിലീപ് ആവശ്യപ്പെട്ടിരുന്നു.
പ്രതികരിക്കാൻ ഇവിടെ എഴുതുക