തിരുവനന്തപുരം: ഇന്ത്യയിലെ ഏറ്റവും കൂടുതല് യുവാക്കള് ജോലി ചെയ്യാന് ഇഷ്ടപ്പെടുന്നത് കേരളത്തിലെന്ന് റിപ്പോര്ട്ട്. ഏറ്റവും പുതിയ ഇന്ത്യ സ്കില്സ് റിപ്പോര്ട്ടിലാണ് ഇക്കാര്യം വ്യക്തമാക്കിയിരിക്കുന്നത്. 18-21 പ്രായക്കാരില് ഏറ്റവും തൊഴില്ക്ഷമതയുള്ള സംസ്ഥാനങ്ങളില് രണ്ടാം സ്ഥാനവും കേരളത്തിനാണ്.
അതേസമയം, പ്രായവ്യത്യാസമില്ലാതെ സ്ത്രീകളും പുരുഷന്മാരും ഒരുപോലെ ജോലിചെയ്യാന് ഇഷ്ടപ്പെടുന്ന നഗരങ്ങളില് കൊച്ചി രാജ്യത്ത് രണ്ടാമതും തിരുവനന്തപുരം നാലാം സ്ഥാനത്തുമെത്തി. ഏറ്റവും കൂടുതല് വനിതകള് തൊഴില് ചെയ്യാനിഷ്ടപ്പെടുന്ന നഗരം കൊച്ചിയാണ്. കമ്പ്യൂട്ടര് നൈപുണ്യതയില് തിരുവനന്തപുരം ഒന്നാം സ്ഥാനവും കൊച്ചി മൂന്നാം സ്ഥാനവും സ്വന്തമാക്കി. കേരളത്തിന്റെ നൈപുണ്യ പരിശീലനത്തിലെ മികവിനാണ് ദേശീയാംഗീകാരം ലഭിച്ചിരിക്കുന്നത്.
രാജ്യത്തെ 51.25 ശതമാനം യുവജനങ്ങളും തൊഴില്ക്ഷമത ഉള്ളവരാണെന്നാണ് റിപ്പോര്ട്ടില് പറയുന്നത. രാജ്യത്തുടനീളം 3.88 ലക്ഷം യുവജനങ്ങളെ പങ്കെടുപ്പിച്ച് ഗൂഗിള്, സിഐഐ, എഐസിടിഇ, എഐയു, ടാഗ്ഡ് എന്നിവരുമായി ചേര്ന്ന് വീബോക്സ് വിപുലമായി നടത്തിയ നാഷണല് എംപ്ലോയബിലിറ്റി ടെസ്റ്റിലൂടെയാണ് ഇന്ത്യ സ്കില്സ് റിപ്പോര്ട്ട് തയ്യാറാക്കിയത്.
വിവിധ നൈപുണ്യ വിഭാഗങ്ങളില് ഉയര്ന്ന പ്രതിഭകളുടെ ലഭ്യതയില് കേരളം മുന്നിരയിലുണ്ടെന്ന് റിപ്പോര്ട്ട് സൂചിപ്പിക്കുന്നു. തൊഴില്ദാതാക്കള്ക്കുള്ള പ്രധാന കേന്ദ്രമെന്ന കേരളത്തിന്റെ നില കൂടുതല് ഉറപ്പിക്കുന്നതാണ് ഈ സ്ഥിതിവിവരക്കണക്ക്.സാങ്കേതിക മുന്നേറ്റങ്ങളോടുള്ള പ്രതിബദ്ധത അടിവരയിടുന്ന വിധത്തില് കേരളത്തിലെ വിദ്യാര്ഥികള് കംപ്യൂട്ടര് നൈപുണ്യത്തില് ഉയര്ന്ന മുന്നേറ്റം കൈവരിച്ചതിനെ റിപ്പോര്ട്ട് പ്രത്യേകം പരാമര്ശിക്കുന്നു. പ്രായോഗിക പഠനത്തോട് പ്രതിബദ്ധതയുള്ള, വിദ്യാഭ്യാസത്തിന് ഊന്നല് നല്കുന്നതിന് പേരുകേട്ട ദക്ഷിണേന്ത്യന് സംസ്ഥാനമായും കേരളത്തെ റിപ്പോര്ട്ടില് ചൂണ്ടിക്കാണിക്കുന്നു.
പ്രതികരിക്കാൻ ഇവിടെ എഴുതുക