തിരുവനന്തപുരം: രാവിലെ 7 മണിയോടെ സംസ്ഥാനത്ത് ലോക്സഭാ തെരഞ്ഞെടുപ്പ് ആരംഭിച്ചെങ്കിലും യന്ത്ര തകരാറിനെ തുടര്ന്ന് പല ബൂത്തുകളിലും പോളിങ് വൈകുകയാണ്. കോട്ടയം അയ്മനം 116 നമ്പര് ബൂത്തില് യന്ത്രത്തകരാർ കാരണം പോളിംഗ് വൈകി.
വയനാടും യന്ത്രത്തകരാർ ഉണ്ടായി. കോട്ടത്തറ ചീരകത്ത് 23-ാം നമ്പര് ബൂത്തിലാണ് യന്ത്ര തകരാർ. ഇവിടെ വോട്ടിംഗ് താത്കാലികമായി നിർത്തിവെച്ചിരിക്കുകയാണ്. കോഴിക്കോട് കോട്ടൂര് പഞ്ചായത്തിലെ മൂലാട് ഹിന്ദു എല്പി സ്കൂളിലും പ്രശ്നങ്ങൾ നേരിട്ട്.
വോട്ടെടുപ്പിന്റെ ആദ്യമണിക്കൂറില് 19.06 ശതമാനം പോളിങ്ങാണ് കേരളത്തിൽ രേഖപ്പെടുത്തിയത്. കോട്ടയത്താണ് ഏറ്റവുമധികം പോളിങ് രേഖപ്പെടുത്തിയത് .
20 ലോക്സഭ മണ്ഡലങ്ങളിലായി 2.77 കോടി വോട്ടർമാരാണ് വോട്ട് ചെയ്തത്. വോട്ടെടുപ്പ് തുടങ്ങുന്നതിന് മുന്പെ വോട്ടര്മാര് ബൂത്തുകളിലെത്തിത്തുടങ്ങിയിരുന്നു. വോട്ടര്മാരുടെ നീണ്ട നിര തന്നെയാണ് പല ബൂത്തുകള്ക്ക് മുന്നിലും കാണാൻ കഴിയുന്നത്. ഒരു ലക്ഷത്തിലധികം പോളിങ് ഉദ്യോഗസ്ഥരേയും വിവിധ ബൂത്തുകളിലായി വിന്യസിച്ചിട്ടുണ്ട്. 66303 സുരക്ഷ ഉദ്യോഗസ്ഥരെ ചുമതലപ്പെടുത്തിയിട്ടുണ്ട്. പ്രശ്നബാധിത ബൂത്തുകളില് കേന്ദ്രസേന ആയിരിക്കും സുരക്ഷ നിർവഹിക്കുക.
ഒന്നരമാസത്തെ വാശിയേറിയ പ്രചരണങ്ങൾക്ക് ശേഷമാണ് കേരളം ഇന്ന് പോളിംഗ് ബൂത്തിലേക്ക് കടക്കുന്നത്. രാവിലെ ഏഴ് മണി മുതൽ വൈകുന്നേരം 6 വരെയാണ് വോട്ടെടുപ്പ്. കേരളത്തിലെ 20 ലോക്സഭ മണ്ഡലങ്ങളിലേക്ക് 194 സ്ഥാനാർഥികളാണ് മത്സരിക്കുന്നത്.
2.77 കോടി വോട്ടർമാരാണുള്ളത്. കൂടുതലും സ്ത്രീകള് തന്നെയാണ്. 5,34,394 പേര് ജനാധിപത്യ പ്രക്രിയയില് ആദ്യമായി പങ്കാളിയാകുന്ന കന്നിവോട്ടര്മാരാണ്. കഴിഞ്ഞ തവണ 77.84 ശതമാനമെന്ന മികച്ച പോളിങാണ് രേഖപ്പെടുത്തിയത്. ഇത്തവണയും വോട്ടര്മാര് കൂട്ടത്തോടെ വോട്ടിനെത്തുമെന്നാണ് രാഷ്ട്രീയ കേരളം പ്രതീക്ഷിക്കുന്നത്.
പ്രതികരിക്കാൻ ഇവിടെ എഴുതുക