കോഴിക്കോട്: കോണ്ഗ്രസ് അദ്ധ്യക്ഷന് രാഹുല് ഗാന്ധിയും പ്രിയങ്ക ഗാന്ധിയും കോഴിക്കോട്ടെത്തി. വയനാട് മണ്ഡലത്തില് നാമനിര്ദ്ദേശ പത്രിക സമര്പ്പിക്കുന്നതിനായാണ് രാഹുല് ഗാന്ധി കോഴിക്കോട്ടെത്തിയത്. കരിപ്പൂര് വിമാനത്താവളത്തില് വിമാനമിറങ്ങിയ രാഹുലിന് മലബാറിലെ വിവിധ ജില്ലകളില് നിന്നെത്തിയ പ്രവര്ത്തകര് ആവേശോജ്ജ്വല സ്വീകരണം നല്കി.
രാഹുലിനും മുന്പേ തന്നെ എഐസിസി ജനറല് സെക്രട്ടറി പ്രിയങ്കാ ഗാന്ധി കരിപ്പൂരില് വിമാനമിറങ്ങിയിരുന്നു. എയര്പോര്ട്ടിലെ വിഐപി ലോഞ്ചില് രാഹുലിനായി കാത്തിരുന്ന പ്രിയങ്ക രാഹുലിനൊപ്പം ഒരുമിച്ചാണ് പുറത്തേക്ക് വന്നത്. നാളെ രാവിലെ അദ്ദേഹം വയനാട് കളക്ടറേറ്റില് എത്തി നാമനിര്ദ്ദേശ പത്രിക സമര്പ്പിക്കും.
കല്പ്പറ്റയിലെ എകെഎംജെ ഹൈസ്കൂള് ഗ്രൗണ്ടില് ഹെലികോപ്റ്റര് ഇറങ്ങുന്ന രാഹുല് ഗാന്ധി ബസ് സ്റ്റാന്റിന് സമീപത്തു കൂടെ ഏതാണ്ട് രണ്ട് കിലോമീറ്റര് റോഡ് മാര്ഗ്ഗം സഞ്ചരിച്ച് കളക്ട്രേറ്റിലെത്തുമെന്നാണ് തീരുമാനം. നാമനിര്ദ്ദേശ പത്രിക സമര്പ്പിക്കാനുള്ള രാഹുലിന്റെ യാത്ര റോഡ് ഷോ രൂപത്തിലാണ് ക്രമീകരിച്ചിട്ടുള്ളത്. കോണ്ഗ്രസ് പ്രവര്ത്തകരെ പരമാവധി അണിനിരത്തി റോഡ് ഷോ ആവേശത്തിലാക്കാനാണ് കോണ്ഗ്രസ് തീരുമാനം.
രാഹുലിന്റെ വരവിനോട് അനുബന്ധിച്ചുള്ള ക്രമീകരണങ്ങള് ചര്ച്ച ചെയ്യാന് മുതിര്ന്ന കോണ്ഗ്രസ് നേതാക്കള് കോഴിക്കോട്ട് യോഗം ചേര്ന്നിരുന്നു. കെ സി വേണുഗോപാല്, മുകുള് വാസ്നിക്, മുല്ലപ്പള്ളി രാമചന്ദ്രന് ,പി കെ കുഞ്ഞാലിക്കുട്ടി, ഉമ്മന് ചാണ്ടി, രമേശ് ചെന്നിത്തല, വയനാട്, കോഴിക്കോട്, മലപ്പുറം ഡിസിസി പ്രസിഡന്റുമാര് എന്നിവരാണ് യോഗത്തില് പങ്കെടുത്തത്.
പ്രതികരിക്കാൻ ഇവിടെ എഴുതുക